“Dünya uşaqların gözü ilə - Avropa turnesi”

 

 

 

 

 

 

 

 

 

 

 


Dünyanın əksər ölkələrində olduğu kimi, 1iyun – Uşaqların Beynəlxalq Müdafiəsi Günü Azərbaycanda da qeyd edilir.  Bu münasibətlə Azərbaycan Milli İncəsənət Muzeyində rəssam Tatyana Kesarın rəhbərlik etdiyi Art Studiyasının layihəsi əsasında “Dünya uşaqların gözü ilə - Avropa turnesi” adlı sərgi keçirilir. Sərgidə Tatyana Kesarın yetirmələrinin Avropanın paytaxt şəhərlərinin ən yaxşı qalereyalarında sərgilənən əsərləri nümayiş olunacaq.

Azərbaycan Rəssamlar İttifaqının üzvü Tatyana Kesarın rəhbərlik etdiyi və Tofiq İsmayılov adına Uşaq və Gənclər Yaradıcılıq Sarayı nəzdində fəaliyyət göstərən Art Studiyası öz yetirmələrində təsviri sənətə məhəbbət oyadaraq 25 ildən artıqdır ki, fəaliyyət göstərir.

Bu müddət ərzində Tatyana Kesarın tələbələri dəfələrlə dünyanın müxtəlif ölkələrində - Yaponiya, Fransa, ABŞ, Polşa, Rusiya və Ukraynada keçirilən fərqli beynəlxalq rəsm və təsviri sənət sərgilərinin iştirakçıları və qalibləri olmuşlar. 1993-cü ildə rəssamın yetirməsi Anar Mustafayev Yaponiyada beynəlxalq uşaq rəsm müsabiqəsində gümüş medalla mükafatlandırılmış, digər istedadlı gənc - Afaq Bəşirova 2006-cı ildə Fransada keçirilən beynəlxalq müsabiqədə birinci yerin qalibi olmuşdur. Studiyanın gənc rəssamlarının əldə etdiyi mükafatlar içərisində xüsusilə bir faktı qeyd etmək olar ki, onlardan biri – Stanislav Şpaninin adı ən gənc professional rəssam kimi “Ginnesin Rekordlar Kitabı”na düşməyə layiq görülmüşdür.

Studiyanın yetirmələri Münəvvər Muxtarova və Kamilla Hacıyeva Tsiperoviçin əsərləri Berlin muzeyinin ekspozisiyasına daxil olmuşdur.

Studiyanın dünyanın bir çox ölkələrində - Bolqarıstan, Belçika, İspaniya, Avstriya, İtaliya, İngiltərə və Macarıstanda həyata keçirilən fərdi sərgiləri tamaşaçıların marağına səbəb olmuşdur.

Öz fəaliyyəti dövründə Tatyana Kesar dəfələrlə müxtəlif lahiyələrə imza atmışdır. “Portret və xarakter” Tatyana xanım tərəfindən həyata keçirilən ilk bədii layihədir. Gənc azərbaycanlı rəssamların növbəti sərgisi 2010-cu ildə Bolqarıstanda keçirilən “Bizim emalatxana–Sofiya vernisajı”dır. “Bizim emalatxana–Sofiya vernisajı” sərgisinin ideyası rəssamlıq sənətinin dahi sənətkarları: Leonardo da Vinçi, Piter Paul Rubensdən götürülmüşdür.

Belə layihələrdən biri Azərbaycanın Avstriyadakı səfərliyinin dəstəyi ilə 2012-ci ildən fevral ayının 6-dan 12-dək davam etmiş  Vyana şəhərində keçirilmiş  “Vyana nağılı” sərgisidir.

Hər dəfə yeni bir layihə ilə çıxış edən Tatyana Kesarın şagirdlərinin sərgilərdən biri kimi 2014-cü ilin may ayında Macarıstanın KOGART qalereyasında “Gənc azərbaycanlı rəssamlar Budapeştdə” adlı sərgisini də qeyd etmək olar.

Sərgi 31.05.2014-cü il tarixində, saat 17.00-da  Azərbaycan Milli İncəsənət Muzeyinin Niyazi 11 ünvanında yerləşən binasında keçirilir.

Sərgi iyun ayının 6-dək davam edəcək.

Foto: Ələkbər Ağasiyev

   

Azərbaycan Milli İncəsənət Muzeyinin direktoru professor Çingiz Fərzəliyev, Böyük Britaniyanın Kembric Universitetinin təsis etdiyi 2014-cü il “İncəsənətdə görkəmli şəxs” mükafatına namizədliyi təqdim olunmuşdur

Azərbaycan Milli İncəsənət Muzeyinin direktoru professor Çingiz Fərzəliyev, Böyük Britaniyanın Kembric Universitetinin təsis etdiyi 2014-cü il “İncəsənətdə görkəmli şəxs” mükafatına namizədliyi təqdim olunmuş və Böyük Britaniyanın Beynəlxalq Bioqrafik Mərkəzinin incəsənətdə görkəmli şəxslər siyahısına daxil edilmişdir.

Mükafatlandırma mərasimi 2014-cu ilin sentyabrında Beynəlxalq incəsənət, kommunikasiya, elm və texnologiya konqressi çərçivəsində Kembric Universitetinin Kral zalında keçiriləcək.

Xatırladaq ki, Çingiz Fərzəliyev Azərbaycan Dövlət Rəssamlıq Akademiyasının professoru, Rusiya Rəssamlıq Akademiyasının fəxri üzvü, Özbəkistan İncəsənət Universitetinin fəxri professorudur, 2010-ci ildən Azərbaycan Milli İncəsənət Muzeyinə rəhbirlik edir, “Azərbaycan rəngkarlığının antologiyası”, “Azərbaycan Milli İncəsənət Muzeyi”, “Azərbaycan xalq sənəti”, “Natürmort” və bir çox kitabların müəllifidir.

   

"Azərbaycan incəsənəti fotoqrafların gözü ilə" adlı müsabiqə

BP şirkətinin dəstəyi ilə Azərbaycan Milli İncəsənət Muzeyində  “Beynalxalq Muzeylər Günü” ilə əlaqədar  16 may saat 16.00-da "Azərbaycan incəsənəti fotoqrafların gözü ilə" adlı müsabiqənin nəticələrinə görə mükafatlar təqdim olunmuş və müsabiqə iştirakçılarının fotolardan ibarət sərgi nümayiş olunmuşdur.

Foto: Ələkbər Ağasiyev

   

"Əbədi Gənc Bakı" Ümummilli lider Heydər Əliyevin 91 illiyinə həsr edilmiş tədbir

7 may 2014-cü il tarixində Azərbaycan Milli İncəsənət Muzeyində Azərbaycanın Ümummilli lideri H. Əliyevin anadan olmasının 91 illiyinə həsr olunmuş “Əbədi Gənc Bakı” adlı tədbir keçirilib.
Tədbir Azərbaycan Milli İncəsənət Muzeyinin, Azərbaycan Respublikasının Nazirlər Kabineti yanında “İçərişəhər” Dövlət Tarix-Memarlıq Qoruq İdarəsi “İçərişəhər” tarixi muzeyinin, Azərbaycan Musiqi Mədəniyyəti Dövlət Muzeyinin və Ü.Hacıbəyli adına Bakı Musiqi Akademiyasının birgə böyük layihəsi idi.
Tədbirdə “Bakı-dünən, bu gün və sabah" videoçarxı, rəqəmli formatda “Qədim şəhərə səyahət” filmi və Ümummilli lider Heydər Əliyevə həsr olunmuş sərgi nümayiş olundu.
Məruzəylə “İçərişəhər” tarixi muzeyinin baş mütəxəssisi F.Seyidova çıxış etdi. Tədbirdə, həmçinin T.Quliyevin, R.Hacıyevin, V.Mustafazadənin, F.Bədəlbəylinin, S.Ələsgərovun, F.Sücəddinovun və başqa bəstəkarların əsərlərindən ibarət konsert keçirildi.

Foto: Ələkbər Ağasiyev

   

Səhifə 30 > 37-dəan