Sərgilər

Tbilisidə Ömər Eldarov və Merab Merabişvilinin əsərlərinin fotosərgisi açılıb

2017-ci ilin iyunun 16-da Tbilisidə Simon Canaşiya adına Gürcüstanın Milli Muzeyində qeyri-adi formatda Azərbaycan və Gürcüstanın heykəltaraş-patriarxları Ömər Eldarov və Merab Merabişvilinin əsərlərinin fotoşəkillərindən ibarət "Dostluq" sərginin açılışı oldu.

Ustad heykəltəraşların yaratdıqları əsərlərin fotoları tamaşaçıya miqyasına görə təqdimetmə üslubunu özləri diktə etdilər. Ekspozisiyanın bu cür maraqlı tərtibatı Gürcüstan Mədəni Birliyi, Gürcüstan Milli Muzeyi və Azərbaycan Mili İncəsənət Muzeyinin dəstəyi ilə “XXI Mədəni Dialoq” Assosiasiyası tərəfindən həyata keçirilmişdir. Təşkilatçılar iki Zaqafqaziya dövlətinin mədəniyyət və incəsənətinin nə dərəcədə yaxın olduğunu təcəssüm etdirməyi qarşısına məqsəd qoymuşdular.

Foto sərginin açılış mərasimində çıxış edən Gürcüstan Milli Muzeyinin baş direktoru, Gürcüstan Elmlər Akademiyasının müxbir üzvü David Lordkipanidze və Azərbaycan Milli İncəsənət Muzeyinin direktoru, Azərbaycanın Əməkdar incəsənət xadimi, professor Çingiz Fərzəliyev vurğulayıblar ki, bu kimi tədbirlər iki qonşu dövlətin sıx dostluq əlaqələrini möhkəmləndirməklə yanaşı, özündə heç bir sərhəd tanımayan mədəniyyətlərarası dialoqun universal dili kimi də xüsusi ismarıc daşıyır. Yaradıcı insanlar daima sistemdən kənarda qalırlar. Onlar üçün Gözəllik və Bədii ideya yeganə meyardır. Əsərləri xeyli sayda dövlət mükafatı ilə təltif olunmuş beynəlxalq nüfuzlü heykəltaraşlar - Ömər Eldarov və Merab Merabişvili buna parlaq nümunədir.

Hər iki heykəltəraş öz yaradıcılıqları ilə nəinki Ustad, həmçinin Patriarx və Patriot adına layiqdirlər. Onlar daima milli incəsənəti: Ömər Eldarov – Azərbaycanı, Merab Merabişvil i- Gürcüstanı təbliğ etmişlər.

Tbilisdə keçirilən bu sərgi 29 iyun tarixinədək davam edəcək, daha sonra ekspozisiya Azərbaycan Milli incəsənət Muzeyində nümayiş olunacaq.

 
 

“Hədəf:Bahar” foto sərgisi açılıb

Mayın 30-da Azərbaycan Milli İncəsənət Muzeyində Azərbaycan təbiətinin gözəlliklərinə, onun rayonlarının landşaft müxtəlifliyinə həsr olunmuş “Hədəf: Bahar” foto sərgisi açılıb.

Bahar ilin elə bir zamanıdır ki, hətta boz səhralar çiçəklənir, təbiət pardaq və əlvan güllü xalçaya bürünür.

Azərbaycan - tamamilə zidd təbii zonalarının məcmusu üzrə unikal ölkədir, burada heyrətamiz təbiət müxtəlifliklərini görmək mümkündür: səhra, çöl, tropik plantasiyalar, qayalıq, dəniz sahili, yayla, dağ çəmənləri, yüksək dağ meşələri, rəngarəng çiçəklənən naxışlarla örtülmüş əzəmətli düzənliklər.

Vernisajı Azərbaycan Milli İncəsənət Muzeyinin direktor müavini Xədicə Əsədova açaraq məhz fotorəssamaların bu sərgi üçün müxtəlif regionlarımıza səfər etdiyini, onların fotolarda Azərbaycan baharının heyrətamiz rəngarəngliyini yaradıcılıq baxışları ilə təcəssüm etdiklərini qeyd edib. Daha sonra X. Əsədova foto müəllifləri qonaqlara təqdim edib.

Sərginin kuratoru Rüstəm Hüseynov bildirib ki, sözlə dilə gətirə bilmədiklərini, fotonun dili ilə göstərməyə çalışıb. Layihənin məqsədinin Azərbaycan təbii mirasının gözəlliklərini və müxtəlifliyini foto vasitəsilə nümayiş etdirmək, həmçinin rayonların turizm potensialına maraq artırmaq və mənzərə fotoqrafiyasına incəsənətin bir janrı kimi diqqəti cəlb etmək olduğunu vurğulayıb. 
Sənətsevərlər tərəfindən böyük rəğbətlə qarşılanan vernisajda fotorəssamlar Rüstəm Hüseynov, İlkin Kəngərli, Emil Qazi və Denis Sveçnikov Azərbaycan baharının ən gözəl anlarını əks etdirmişlər.


 
 

Britaniyalı rəssamın “İçərişəhərin 100 görüntüsü” adlı sərgisi açılıb

Azərbaycan Milli İncəsənət Muzeyində Böyük Britaniya rəssamı Edvard Tvoxiqin “İçərişəhərin 100 görüntüsü” adlı sərgisi açılıb.

Açılış mərasimində muzeyin Elmi araşdırmalar şöbəsinin müdiri Toğrul Əfəndiyev, “British Council” təşkilatının Azərbaycan nümayəndəliyinin rəhbəri Elizabet Vayt rəssam haqqında məlumat veriblər. Bildirilib ki, Edvard Tvoxiq 1969-cu ildə İrlandiyada anadan olub. Kroford İncəsənət və Dizayn Kollecində təhsil alıb. Çelsi İncəsənət Kollecində qravüra və fotoqrafiya sənəti üzrə ixtisaslaşıb, burada o, Britaniya Şurasından təqaüd alan ilk irlandiyalı tələbə olub.

Diqqətə çatdırılıb ki, Edvard Tvoxiq rəssamlıqla yanaşı, Vellinqton İncəsənət Kollecinə rəhbərlik edir. Oymaçı Rəssamların London Kral Cəmiyyətinin həqiqi üzvü, Banksayd Qalereyasının hamisidir. O, ingilis yazıçısı, rəssam və mütəfəkkir C.Raskinin: “Siz incəsənətin nəyi əks etdirdiyini sevməsəniz, heç vaxt onu dərindən sevə bilməzsiniz” fikrinə inanır. Rəssam əsərlərini təbiətdən ilhamlanaraq bilavasitə naturadan yaradır, sonra yadında qalan məqamlar əsasında kompozisiyalarını tamamlayır. O, təbiətin gözəlliyini rəsm, fotoqrafiya, xüsusən də rəssamın xətt ustalığını göstərən quru iynə texnikasında təcəssüm etdirir. Bleyk, Ravilious və Semuel Palmerin təsirinin duyulduğu bu qravüralar ingilis pastoral ənənəsinə mühüm töhfədir.

Qeyd olunub ki, Edvard Tvoxiqin “Yer üzü və xətt” (Berstou qalereyası,Brayton), “Təbiətin tərənnümü” (Berkşir), “Görünən poeziya” (İrlandiya Respublikası), “Gözəl mənzərə” (Saffolk), “Edvard Tvoxiq Bakıda və Azərbaycanda” (Bakı) adlı fərdi sərgiləri keçirilib.

Edvard Tvoxiq sərginin təşkilinə görə təşəkkürünü bildirib və rəsmləri barədə məlumat verib.


 
 

Xalq rəssamı Davud Kazımovun yubiley sərgisinin açılışı oldu

Azərbaycan Respublikasının Mədəniyyət və Turizm Nazirliyinin təşəbbüsü ilə Azərbaycan Milli İmcəsənət Muzeyində Azərbaycanın Xalq rəssamı Davud Kazımovun yubiley sərgisi keçirildi.

Tədbiri muzeyin direktoru, professor Çingiz Fərzəliyev açaraq Xalq rəssamı D.Kazımovun yubiley sərgisi və nümayiş etdirilən əsərlər haqqında bilgi verdi.

Azərbaycan Dövlət Rəssamlıq Akademiyasının rektoru, Xalq rəssamı Ömər Eldarov mərhum D.Kazımovun milli rəssamlıq sənətimizdə özünəməxsus yerindən, çoxşaxəli yaradıcılığından danışdı, onun əsərlərinin əbədiyaşarlığını dilə gətirdi.

Xalq rəssamı Səlhab Məmmədov sənətkarın rəssamlığın müxtəlif janrlarında dəyərli əsərlər yaratdığını söylədi.

Rəssamlar İttifaqının katibi, Xalq rəssamı Ağəli İbrahimov görkəmli rəngkar D.Kazımovun təsviri sənətimizin inkişafında göstərdiyi xidmətlərdən söz açdı. 
Rəssamın oğlu Mehdi Kazımov sərginin təşkili üçün zəhməti keçən hər kəsə sayğısını bildirdi.

Sərgidə rəssamın ““Ana”, “Məhsul yığımı”, “Xurmalarla natürmort”, “Bənövşələr”, “Bağda”, “Xəzərin yeraltı sərvətləri”, “İspan silsiləsindən”, “Bolqarıstan silsiləsindən”, “Şahdağ”, “Göygöl”, “Şamaxı yolu”, “Çöl gülləri”, “Batabat”, “Abşeron mənzərəsi” kimi tabloları nümayiş olunur.

Qeyd edək ki, Xalq rəssamı Davud Kazımov 1926-cı ildə Bakıda dünyaya göz açıb. Sənətin sirlərini ilk olaraq Pionerlər evindəki rəssamlıq dərnəyində alan sənətkar, 1941-1945-ci illərdə Azərbaycan Dövlət Rəssamlıq Məktəbində təhsilini davam etdirmişdir. Onun rəssam kimi yetişməsində müəllimləri K. Xanlarov, B. Mirzəzadə, Ə. Məmmədov, L. Pridatok, A. Qorçakov, S. Bəhlulzadə, M. Rəhmanzadə kimi görkəmli fırça ustalarının əməyi olmuşdur.

Geniş yaradıcılıq diapazonuna malik Davud Kazımov təsviri sənətimizdə orijnal dəsti-xətti, fərdi rəng duyumu, lirizmi ilə özünəməxsus iz qoymuşdur. Görkəmli rəssam rəngkarlıq incəsənətinə olduğu kimi, Azərbaycan qrafika sənətinə də bədii töhfələr vermişdir.

Rəssam Azərbaycan təbiətinin gözəlliklərini, xalqımız entoqrafik incəlikəri və adət-ənənələrini, zəhmət insanlarının həyat tərzini rənglərin dilli ifadə etmişdir. 
Davud Kazımov gərgin yaradıcılıq fəaliyyəti ilə yanaşı, özünün çoxillik zəngin sənət təcrübəsini gənc rəssamlar nəslinin yetişməsinə sərf edərək milli rəssamlıq məktəbinin inkişafına töhfələr vermişdir. 1947-1966-cı illərdə ilk rəssamlıq təhsilini aldığı Azərbaycan Dövlət Rəssamlıq Məktəbində, daha sonralar isə M. A. Əliyev adına Azərbaycan Dövlət İncəsənət İnstitutunda və Azərbaycan Dövlət Rəssamlıq Akademiyasında pedaqoq kimi fəaliyyət göstərmişdir.

Davud Kazımovun bənzərsiz yaradıcılığı nəinki respublikamızda, həm də onun hüdudlarından kənarda yüksək dəyərləndirilmiş və sevilmişdir. Rəssamın əsərləri Almaniya, İtaliya, Çexoslovakiya, Türkiyə və bir çox başqa xarici ölkələrdə böyük müvəffəqiyyətlə nümayiş etdirilmişdir.

Davud Kazımov 2015-ci ildə vəfat etmişdir.


 
 

Səhifə 1 > 21-dəan