Sərgilər

“Reinkarnasiya” sərgisi

Azərbaycan Milli İncəsənət Muzeyinin 80 illik yubileyi ilə bağlı muzeyin və gənc rəssamların birgə layihəsi olan “Reinkarnasiya”  adlı növbəti sərgi keçiriləcəkdir. Sərgidə muzeyin fəaliyyətində yenilik olan növbəti innovativ layihədə müasir Azərbaycan rəssamlarının muzeyin qızıl fonduna daxil olan və stasionar ekspozisiyada nümayiş edilən məşhur rəssam və heykəltəraşların əsərləri əsasında yaratdıqları reinkarnasiya (ruhun yenidən qayıdışı) olunmuş avanqard üslublu əsərlər nümayiş olunacaq. Vernisajda rəssamlar Elşən Sərxanoğlu, Məmməd Rəşidov, Vüqar Quliyev, Aydın Əsgərov, Elşən Qaraca, Emin Qəhrəmanov tərəfindən 15-ə yaxın rəngkarlıq və 5 heykəltəraşlıq əsəri yeni interperetasiyada, müasir baxış konteksində təqdim olunur. Yubiley çərçivəsində təşkil olunmuş sərginin təqdimatı 26 may 2016-cı il  tarixində, saat 17:00-da Azərbaycan Milli İncəsənət Muzeyinin Niyazi 11 ünvanında keçiriləcəkdir. Sənətsevərlərin və mütəxəssislərin böyük marağına səbəb olacaq ekspozisiya muzeyin fəaliyyətində və eyni zamanda rəssamların yaradıcılığında yeni bir səhifə açacaqdır.


 
 

Tanınmış rəssam və heykəltaraş Əkbər Behkəlamın fərdi yaradıcılıq sərgisi

Azərbaycan Mədəniyyət və Turizm Nazirliyi, Azərbaycan Milli İncəsənət Muzeyi və Azərbaycan Rəssamlar İttifaqının birgə təşəbbüsü ilə Almaniyada yaşayan soydaşımız, tanınmış rəssam və heykəltaraş Əkbər Behkəlamın fərdi yaradıcılıq sərgisi keçirilmişdir. Əkbər Behkəlam 1944-cü ildə Təbrizdə anadan olmuşdur. 1961-1964-cü illərdə Təbriz İncəsənət Məktəbində ilk rəssamlıq təhsilini almışdır. Daha sonra İstanbulda Memar Sinan adına Gözəl Sənətlər Universitetində Bədri Rəhmi Eyyuboğlunun sinfində təhsilini davam etdirmişdir. 1972-1974-cü illərdə yeni yaradıcılıq axtarışları ilə bağlı Avropanın Paris, Frankfurt, Roma və Berlin şəhərlərində yaradıcılıqla məşğul olub. 1974-cü ildə İrana qayıdan rəssam, 1976-cı ilədək Təbrizdə İncəsənət Məktəbində müəllim kimi çalışıb.  1976-cı ildə Əkbər Behkəlam Almaniyanın Berlin və Brandenburq şəhərlərində yaradıcılıq fəaliyyətini davam etdirib.  Onun əsərləri əsasən siyasi mövzularla bağlıdır. Yaradıcılığının erkən dövründə yeni Avropa realizminin və İran miniatür rəngkarlığının təsiri ilə əsərlər yaradan rəssamın, tablolarında daha sonralar şərtiliyə, simvolizmə güclü meyl müşahidə edilir. Onun əsərləri güclü rəng çalarları, dinamik ekspressiya, hərəkət və hadisələrə fəlsəfi baxışı ilə səciyyələnir. Məhsuldar yaradıcılığı ilə seçilən rəssamın əsərləri Tehran, Almaniyanın bir çox şəhərlərində, Los-Anceles, Braziliya, İstanbul, Kosovo, Slovakiyanın Brateslava və bir çox ölkələrin muzey və qalereyalarında çox uğurla numayış olunmuşdur.  Rəssamın Azərbaycanda keçirilən ilk fərdi sərgisində 27 rəsm əsəri - “Günəş həsrəfi”, “Günorta bürküsü”, “Batan qayıq”, “Faciəni nəzərə alaraq”, “İnsan mənzərələri” və digər nümunələri sənətsevənlərin ixtiyarına verilmişdir.

Foto: Ələkbər Ağasiyev

 
 

Gənc rəssam Məryəm Ələkbərlinin “Əsrlərin sədası” adlı rəsm sərgisini

Noyabrın 25-də Azərbaycan Milli İncəsənət Muzeyində istedadlı gənc rəssam Məryəm Ələkbərlinin “Əsrlərin sədası” adlı rəsm sərgisinin açılışı oldu. Mərasimə baş nazirin müavini Elçin Əfəndiyev, mədəniyyət və turizm naziri Əbülfəs Qarayev, Bakıda keçirilən İslam Təhsil, Elm və Mədəniyyət Təşkilatı (İSESCO) İcraiyyə Şurasının 36-cı iclasının və 12-ci Baş Konfransının iştirakçıları qatılmışdı. Tədbiri giriş sözü ilə açan baş nazirin müavini Elçin Əfəndiyev İSESCO-nun yüksək səviyyəli toplantılarının ölkəmizdə keçirilməsinin əhəmiyyətindən danışdı. Bildirdi ki, bu tədbirlər çərçivəsində Bakıya gələn qonaqlara xalqımızın zəngin mədəniyyəti, tarixi və müasir inkişafı ilə yanaşı, ölkəmizdə gedən quruculuq və abadlıq işləri ilə yaxından tanış olmaq imkanı yaradılıb. Sərgi barədə danışan Elçin Əfəndiyev vurğuladı ki, istedadlı gənc rəssam Məryəm Ələkbərlinin ekspozisiyada nümayiş olunan 50-dək rəsm əsəri öz ruhunu milli dəyərlərdən alır: “Bu əsərlərdəki Qobustanın qayaüstü yazıları, Azərbaycanın muğam sənəti, İçərişəhərin tarixi abidələri mədəni irsimizin müasir simasını təcəssüm etdirir. “Əsrlərin sədası” sərgisi mövzu etibarı ilə insanı xoşbəxtliyə və tolerantlığa, birliyə və bərabərliyə çağırır”. Dünyada islam ölkələrinə qarşı ikili standartların nümayiş olunduğunu diqqətə çatdıran Elçin Əfəndiyev qeyd etdi ki, buna baxmayaraq bütün müsəlman ölkələri bəşəriyyəti dincliyə, xoşbəxtliyə, insanlığa və tolerantlığa dəvət edir. Vurğulandı ki, bir müsəlman ölkəsinin övladı olan gənc rəssamın bu sərgidəki əsərləri də qeyd olunan xüsusiyyətləri özündə ehtiva edir. Elçin Əfəndiyev Məryəm Ələkbərlini sərgi münasibətilə təbrik edərək ona yeni yaradıcılıq uğurları arzuladı. Tədbirdə çıxış edən İSESCO-nun baş direktoru Əbdüləziz Osman əl-Tuveycri Azərbaycanın zəngin tarixə və mədəniyyətə malik olduğunu diqqətə çatdırdı və beynəlxalq səviyyəli möhtəşəm tədbirlərin Bakıda keçirilməsini yüksək qiymətləndirdi. Baş direktor ölkəmizin İSESCO İcraiyyə Şurasının toplantılarına ev sahibliyi etməsini əməkdaşlığın inkişafında irəliyə doğru addım kimi dəyərləndirdi, bunun təşkilatda təmsil olunan ölkələrin mədəniyyət, elm və təhsil sahəsində əlaqələrinə müsbət təsir edəcəyini vurğuladı. Sonra qonaqlar sərgi ilə tanış oldular. Ağ Şəki ipəyi üzərində qarışıq texnikada işlənmiş tablolar istər rəng və yozum baxımından, istərsə də özünəməxsus qeyri-adi dəst-xətti ilə diqqəti cəlb edir. Rəssamın qövsi-qüzehin yeddi rəngini ehtiva edən kətan üzərindəki işləri isə Qobustan qayaüstü təsvirlərinin əsas mövzularının davamı olaraq qədim inanc, ayin və rəqslərin əsrarəngiz mənzərəsini yaradır.

Foto: Ələkbər Ağasiyev

 
 

Gürcü rəssamları Giya Ququşvili və Ketevan Matabellinin fərdi yaradıcılıq sərgiləri

Azərbaycan Respublikası Mədəniyyət və Turizm Nazirliyi və Azərbaycan Milli İncəsənət Muzeyinin birgə təşəbbüsü ilə gürcü rəssamları - Gürcüstan Rəssamlıq Akademiyasının rektoru akademik Giya Ququşvili və professor Ketevan Matabellinin fərdi yaradıcılıq sərgiləri keçirilir “Görüş”, “Qırmız ev”, “Sadə balans”, “Qırmızı qapılar, “Axşam”, “Meşədə gəzinti”, “Dağların kölgəsi”, “Kollaj” və s. əsərlər tamaşaçıların ixtiyarına verilmişdir. Ümumiyyətlə sərgidə 45 sayda əsər nümayiş olunur.Tədbirdə eyni zamanda Gürcüstan Rəssamlıq Akademiyasının rektoru akademik Giorgi Ququşvili, Gürcüstan Milli Muzeyinin direktoru David Lordkipanidze , Gürcüstanın Milli Elmlər Akademiyasının müxbir üzvü professor Valeri Asatiani Azərbaycan Dövlət Rəssamlıq Akademiyası tərəfindən akademiyanın “Fəxri doktoru” adı  ilə təltif olunacaq və Azərbaycan Respublikası Mədəniyyət və Turizm Nazirliyi tərəfindən isə təşəkkür məktubu təqdim olunacaqdır.

Fotoqraf: Ələkbər Ağasiyev

  • 01
  • 02
  • 03
  • 04
  • 05
  • 06
  • 07
  • 08
  • 09
  • 10
  • 11
  • 12
  • 13
  • 14
  • 15
  • 16
  • 17
  • 18
  • 19
  • 20

 
 

Səhifə 4 > 19-dəan