Sərgilər

Xalq rəssamı Maral Rəhmanzadənin yubiley sərgisi

Azərbaycan Respublikasının Mədəniyyət və Turizm Nazirliyinin təşkilatçılığı ilə Azərbaycan Milli İncəsənət Muzeyində Azərbaycan təsviri sənətinin görkəmli nümayəndəsi, Xalq Rəssamı Maral Rəhmanzadənin anadan olmasının 100 illiyinə həsr olunmuş yubiley sərgisi keçirilir.

Sərgidə rəssamın ailəsinin kolleksiyasında, Azərbaycan Dövlət Rəsm Qalereyası və Azərbaycan Milli İncəsənət Muzeyinin fondunda saxlanılan əsərləri nümayiş olunacaqdır.

Maral Rəhmanzadə 1916-cı il iyulun 23-də Bakı şəhərində anadan olmuşdur. O, 1930-1933-cü illərdə Azərbaycan Dövlət Rəssamlıq Texnikumunda oxumuş, 1934-1940-cı illərdə V.İ.Surikov adına Moskva Dövlət Rəssamlıq İnstitutunda təhsilini davam etdirmişdir.

Milli rəngkarlıq məktəbinin inkişafında yüksək xidmətləri olan Maral Rəhmanzadə, təsviri sənətimizin zəngin ənənələrini davam etdirmiş, mənaca dolğun, təbii və yaddaqalan lövhələr yaradaraq, Azərbaycan rəssamlıq sənətinə layiqli töhfələr vermişdir. Mahir fırça ustasının müxtəlif mövzularda əsərləri mədəniyyətimiz tarixinə boyakarlığın qiymətli nümunələri kimi daxil olmuşdur.

Maral Rəhmanzadə qrafika sahəsində xüsusilə məhsuldar çalışmışdır. Onun yaratdığı silsilələrdə Azərbaycanın füsunkar təbiəti dərin emosionallıq və böyük ustalıqla tərənnüm edilmişdir. Rəssamın Vətənimizin ayrı-ayrı guşələrinin, o cümlədən Naxçıvan və Lənkəran, Şamaxı və Quba diyarlarının qədim tarix və təbiət abidələrini, əsrarəngiz mənzərələrini əks etdirən milli koloritli əsərləri qrafik elementlərin lakonikliyi və güclü səmimiyyəti ilə seçilərək müəllifinə rəğbət qazandırmışdır. Doğma yurdun təbii gözəlliklərini sevməyə və qorumağa çağıran həmin əsərlər gənc nəslin vətənpərvərlik ruhunda tərbiyəsində mühüm rol oynamışdır.

Maral Rəhmanzadə kitab qrafikası sahəsində diqqətəlayiq fəaliyyət göstərmişdir. Onun xüsusən klassiklərimizdən Nizami Gəncəvinin, Şah İsmayıl Xətainin və Məhəmməd Füzulinin kitablarına verdiyi bədii tərtibatlar və çəkdiyi çoxsaylı illüstrasiyalar oxucuya əsərlərin məzmunu və qayəsinin obrazlı çatdırılmasında əhəmiyyətli vasitə olmuşdur. Rəssamın portret janrında yüksək sənətkarlıq nümunəsi sayılan əsərləri isə son dərəcə özünəməxsusluğu və nikbin ruhu ilə səciyyələnir.

Azərbaycan qadınına xas gözəlliyin, zərifliyin və zəngin mənəvi aləmin rənglərin əlvan diliylə parlaq ifadəsi Maral Rəhmanzadə yaradıcılığının başlıca xüsusiyyətlərindən biri idi. Sənətkarın ümumən zəhmət adamlarının, o cümlədən dəniz neftçilərinin rəşadətli əməyindən bəhs edən tabloları mövzu genişliyi, palitra əlvanlığı və məzmun dolğunluğu ilə seçilir.

Maral Rəhmanzadənin geniş diapazonlu yaradıcılığı hər zaman sənətsevərlərin diqqət mərkəzində olmuş və daim yüksək qiymətləndirilmişdir. O, milli təsviri sənətin inkişafındakı böyük xidmətlərinə görə bir çox orden və medalla təltif edilmiş, o cümlədən "Şöhrət" ordeninə layiq görülmüşdür.

Sərgidə rəssamın “Dağ mənzərəsi”, “Göy-göl”, “Dağ qızları”, “Naxçıvan gözəlləri”, “Qızlar bulağı”, “Avtoportret”, “İçərişəhər”, “Ordubad dağları” kimi 85-ə yaxın əsərləri nümayiş olunur.

Tədbirin açılış mərasimi 15 noyabr 2016-ci il tarixində, saat 17.00-da Azərbaycan Milli İncəsənət Muzeyinin Niyazi 9/11 ünvanında keçiriləcək və noyabrın 19-dək davam edəcək.

 
 

Görkəmli rəssam Əyyub Hüseynovun yubiley sərgisi

Oktyabrın 25-də Azərbaycan Respublikasının Mədəniyyət və Turizm Nazirliyinin təşkilatçılığı ilə Azərbaycan Milli İncəsənət Muzeyində Əməkdar incəsənət xadimi, görkəmli rəssam Əyyub Hüseynovun 100 illik yubileyinə həsr olunmuş fərdi yaradıcılıq sərgisi açıldı.

Mədəniyyət və Turizm nazirinin müavini Ədalət Vəliyev çıxış edərək sərginin əhəmiyyətindən söz açıb. Sənətkarın həyat və yaradıcılığından bəhs edən nazir müavini deyib ki, pedaqoji fəaliyyəti ilə yanaşı, Əyyub Hüseynov daim mənzərə və portret janrlarında müxtəlif mövzularda rəngarəng tablolar yaradıb.

Azərbaycan Rəssamlar İttifaqının sədri, Xalq Rəssamı Fərhad Xəlilov və Milli İncəsənət Muzeyinin direktoru, Əməkdar İncəsənət Xadimi Çingiz Fərzəliyev çıxış edərək unudulmaz rəssamın şərəfli ömür yolundan söz açıblar.

Sərgidə rəssamın ailə kolleksiyasında, həmçinin Azərbaycan Milli İncəsənət Muzeyi və Azərbaycan Dövlət Rəsm Qalereyası fondlarında saxlanılan 55-ə yaxın rəngkarlıq və qrafik əsəri nümayiş olunur.

Sərgi 29 oktyabr tarixinədək davam edəcək.

 
 

Əyyub Hüseynovun 100 illik yubileyinə həsr olunmuş fərdi yaradıcılıq sərgisi

Azərbaycan Respublikasının Mədəniyyət və Turizm Nazirliyinin təşkilatçılığı ilə Azərbaycan Milli İncəsənət Muzeyində Əməkdar incəsənət xadimi, görkəmli rəssam Əyyub Hüseynovun 100 illik yubileyinə həsr olunmuş fərdi yaradıcılıq sərgisi keçirilir.

Ə.Hüseynov 1916-cı il sentyabr ayının 3-də Naxçıvanın Noraşan rayonunda  anadan olmuşdur. 1930-cu ildə Azərbaycan Rəssamlıq Texnikumunu, 1935-ci ildə isə Tiflis Rəssamlıq Akademiyasını bitirmişdir. Bir müddət Naxçıvan Dövlət Dram Teatrında tamaşalara səhnə tərtibatı vermiş, eskizlər hazırlamışdır. 1948-ci ildə Bakıya gələrək, Ə.Əzimzadə adına Rəssamlıq Texnikumunda pedaqoji fəaliyyətə başlamış, sonra həmin təhsil ocağında doqquz il direktor vəzifəsində çalışmışdır. Rəssam ömrünün əlli ilini gənc rəssamlar nəslinin yetişməsinə sərf etmiş və bu sahədə əvəzsiz xidmətlər göstərmişdir.

Pedaqoji fəaliyyəti ilə yanaşı Ə.Hüseynov əsərlərində daim mənzərə, portret, məişət janrlarına müraciət etmiş, müxtəlif mövzularda rəngarəng tablolar və özünəməxsus bədii xüsusiyyətləri ilə seçilən üslub yaratmışdır.

Ə.Hüseynovun çoxillik pedaqoji və bədii fəaliyyəti diqqətdən kənarda qalmamışdır. O, 1980-ci ildə Əməkdar incəsənət xadimi fəxri adına layiq görülmüşdür.

17 aprel 1998-ci ildə dünyasını dəyişən rəssam öz ömrünü, bacarığını xalqımızın tərəqqisinə, tanınmasına və incəsənətimizin inkişafına, milli-tarixi mövzuların təbliğinə və milli xarakterə malik, dolğun azərbaycanlı obrazlarının yaradılmasına sərf etmişdir. Sonuncu sərgisi 22 noyabr 2006-cı ildə rəssamın 90 illik yubileyi münasibəti ilə Bakıda S.Bəhlulzadə adına Sərgi salonunda Mədəniyyət və Turizm Nazirliyi tərəfindən təşkil olunmuş, rəssamın həyat və yaradıcılığından bəhs edən kitab çap edilmişdir.

Sərgidə rəssamın ailə kolleksiyasında, həmçinin Azərbaycan Milli İncəsənət Muzeyi və Azərbaycan Dövlət Rəsm Qalereyası fondlarında saxlanılan əsərləri nümayiş olunacaq.

Açılış mərasimi 25 oktyabr 2016-cı il tarixində, saat 17:00-da Azərbaycan Milli İncəsənət Muzeyinin Niyazi 9/11 ünvanında keçiriləcək və 29 oktyabr tarixinədək davam edəcəkdir.


 
 

Xalq rəssamı Vidadi Nərimanbəyovun 90 illik yubiley sərgisi

Azərbaycan Mədəniyyət və Turizm Nazirliyinin təşkilatçılığı ilə iyulun 15-də  Azərbaycan Milli Incəsənət Muzeyində Xalq rəssamı Vidadi Nərimanbəyovun 90 illik yubileyinə həsr olunmuş fərdi yaradıcılıq sərgisi keçirildi.

Sərgidə rəssamın Azərbaycan Milli İncəsənət Muzeyi, Azərbaycan Dövlət Rəsm Qalereyası və ailə kolleksiyasında saxlanılan əsərləri təqdim edildi. Vidadi Nərimanbəyovun illər öncə yaratdığı və indiyədək geniş tamaşaçı kütləsi qarşısında heç vaxt nümayiş etdirilməyən bir neçə əsəri də bu sərgidə nümayiş etdirildi.

Vidadi Yaqub-Fərman oğlu Nərimanbəyov 1926-cı ildə Fransanın Kann şəhərində anadan olmuşdur. Rəssamlıq təhsilini Ə.Əzimzadə adına Bakı Rəssamlıq Texnikumu, V.Muxina adına Sankt-Peterburq (keçmiş Leninqrad) Ali Rəssamlıq Sənaye Məktəbi və Tbilisi Rəssamlıq Akademiyasında almışdır.
"Nədir günahımız?", "Düşmənin sevinci...", "Yolda" və s. əsərləri onu özünəməxsus dəsti-xətti ilə seçilən, istedadlı rəssam kimi məşhurlaşdırmışdır. 1977-ci ildə Bakıda keçirilən fərdi sərgisində Ümummilli lider Heydər Əliyev şəxsən iştirak etmiş, onun yaradıcılığına qiymət vermişdir. V.Nərimanbəyov təkcə Azərbaycanda deyil, eyni zamanda keçmiş SSRİ respublikalarında, Bolqarıstan, Rumıniya, Əlcəzair, Finlandiya, Çexiya, Macarıstan kimi dünyanın 20-dək xarici ölkəsində fərdi yaradıcılıq sərgilərini təşkil edərək, ölkəmizin incəsənətini təbliğ etmişdir. Rəssamın əsərləri Azərbaycan Dövlət İncəsənət Muzeyində, Moskva Dövlət Tretyakov Qalereyasında, MDB və Avropa ölkələrinin muzeylərində saxlanılır.
V.Nərimanbəyov 1972- ci ildə Qrekov adına Qızıl medalla təltif olunmuş, 1982-ci ildə Azərbaycan Xalq Rəssamı fəxri adına layiq görülmüşdür. 1972-1986-cı illərdə Azərbaycan Rəssamlar İttifaqında məsul vəzifələrdə çalışmışdır. 2001-ci ildə "Şöhrət" ordeninə layiq görülmüşdür.
Vidadi Nərimanbəyov 2001-ci ildə vəfat edib.

 
 

Səhifə 4 > 20-dəan