Tədbirlər

“Maarifləndirmə ayı” çərçivəsində növbəti tədbir keçirildi

Aprelin 14-də “Maarifləndirmə ayı” çərçivəsində Azərbaycan Milli İnəcəsənət Muzeyində uşaqlar üçün maraqlı tədbir keçirilmişdir. Belə ki, muzeyi ziyarət edən məktəblilərə TEAS PRESS Nəşriyyat Evi tərəfindən nəşr olunan 3 Alma Uşaq Ədəbiyyatından maraqlı hekayələr oxunmuş və rəssam-illüstrator tərəfindən həmin hekayələrə illüstrasiyaların çəkilmə texnikası izah olunmuşdur. Uşaqların çəkdiyi rəsm-illüstrasiyalar “Qaranquş” uşaq jurnalının növbəti nömrələrində dərc olunacağı barədə jurnalın redaktoru Aysel Zahidqızı tərəfindən qeyd olunmuşdur. Həmçinin balaca kitabsevənlərə 3 Alma Uşaq Ədəbiyyatından olan kitablar və “Qaranquş” jurnalı hədiyyə edilmişdir. Qara Qarayev adına Mərkəzi İncəsənət Məktəbinin kiçik musiqiçiləri öz çıxışları ilə tədbirə xüsusi rəng qatdılar. Sonda uşaqlara muzeyin Qədim Azərbaycan zallarında maraqlı interaktiv ekskursiya keçirilmişdir.

 
 

Azərbaycan Milli İncəsənət Muzeyinin direktoru Çingiz Fərzəliyev "Fəxri professor" adına layiq görüldü

7 aprel tarixində Azərbaycan Milli İncəsənət Muzeyinin direktoru Çingiz Fərzəliyev Rusiya Rəssamlıq Akademiyasının M.V. Surikov adına Moskova Dövlət Akademik İnstitutunun Fəxri professoru adına layiq görülmüşdür. Bunu qeyri-adi hadisə adlandırmaq olar. Düz 50 il bundan öncə, 1967-ci ildə gənc Çingiz Fərzəliyev 180 ildən çox yaşı olan və dünyanın ən nüfuzlu incəsənət ocaqlarından birinin  tələbəsi olmuşdur. İnstitutu bitirdikdən iki il sonra 1975-ci ildə gənc rəssam SSRI-nin Rəssamlar İttifaqının üzvü seçilmişdir. Budur bir vaxtlar tələbə, bu gün isə Azərbaycanın Əməkdar incəsənət xadimi, Azərbaycan Dövlət Rəssamlıq Akademiyasının professoru öz Alma Materindən fəxri ad aldı.

-“Mən doğma institutumun divarları arasına qayıtmağıma şadam” – təntənəli mərasimin sonunda Çingiz Fərzəliyev bildirdi. “Burada aldığım təhsil illərim yaradıcılıq həyatımda çox böyük rol oynamışdır. Doğma Surikov institutunun divarları arasında aldığım fundamental təhsil gələcəkdə mənə sənətşünaslıqla məşğul olmağımda köməklik göstərdi. Mən xoşbəxtəm ki,  bu cür yüksək təhsili  mötəbər institutda almışam. Deyirlər, akademiyanın divarları da öyrədir. Yorulmadan təkrarlaya bilərəm ki, mənim bütün gələcək həyatımı həmkarlarım, o zamanki tələbələr və pedaqoqlarımla ünsiyyət formalaşdırdı. Həmin biliklər uzun illərdir ki, mənimlədir”.

M.V.Surikov adına Moskova Dövlət Akademik İnstitutunun Fəxri professoru diplomunu həmin institutun rektoru, Rusiya Rəssamlıq Akademiyasının vitse-prezidenti, professor Anatoliy Lyubavin təqdim etdi.

-“Dostluq, bir-birimizə olan qarşılıqlı hörmət incəsənət vasitəsilə qəlbimizə, ruhumuza ötürülür. Bu da çox mühümdür. Çünki, incəsənət insanlara sülh bəxş edir, onun tərcüməyə ehtiyacı yoxdur, o sözlərsiz də aydındır” deyə Anatoliy Aleksandroviç bildirdi.

Mərasimdə iştirak edən "Tretyakov Qalereyası" jurnalının baş redaktoru Aleksandr Rojin Çingiz Fərzəliyevin Rusiya və Azərbaycan mədəni əlaqələrinin möhkəmlənməsi işinə əsaslı töhfə verdiyini vurğuladı. "O çox gözəl rəngkardır.  Həmçinin o, sənətşünaslıq və incəsənət tarixi ilə məşğul olmağa imkan verən mükəmməl təhsil almışdır. Rəssam kimi aktiv fəaliyyətlə məşğuldur. Şübhəsiz ki, istedadlı şəxsiyyətdir".

Bu sözlər Çingiz Fərzəliyevin yaradıcılıq fəaliyyətini, onun incəsənətə xidmətini parlaq əks etdirir. Maarifləndirmə sahəsində və vətəninin milli mədəniyyətinin təbliğində gündəlik əmək sərf edir. İncəsənət sərhəd tanımır, onun dili universaldır və dünyanın istənilən ölkəsində aydındır şüarı əsasında bir çox layihələr reallaşmışdır. Çingiz Fərzəliyev bütöv və bölünməz Təsviri İncəsənət dünyasının müxtəlif incə nüanslarını duymağa qadir rəssamdır.

Buna əsaslanaraq nəşr etdyi kitablar bir çox incəsənət ocaqlarında dərs vəsaiti kimi  istifadə olunur. Çingiz Fərzəliyev aşağıda adları çəkilən fundamental nəşrlərin müəllifidir: "Natürmort haqqında hər şey", "Portret haqqında hər şey", "Mənzərə haqqında hər şey", "Azərbaycan rəngkarlığı antologiyası", "Azərbaycan Dövlət İncəsənət Muzeyi", "El sənəti".  XX əsr Azərbaycan təsviri sənətinin 45 görkəmli nümayəndəsinə həsr olunmuş 36 kitabdan ibarət "Sərvət" silsiləsi bilavasitə onun rəhbərliyi ilə hazırlanmışdır.

Diplomun təqdimetmə mərasimində çıxış edən Azərbaycanın Rusiyadakı səfirliyinin məsləhətçisi Vüqar İmaməliyev qeyd etdi ki, "Polad Bülbüloğlu (Azərbaycanın Rusiyadakı səfiri – müəl. red.) YUNESKO-nun baş direktoru vəzifəsinə namizəd olub. Hal-hazırda səfir nominasiya ilə əlaqədar səfərdə olduğundan məndən həmyerlimiz, görkəmli rəssam və  Azərbaycan incəsənətinin inkişafına böyük töhfələr verən şəxsiyyəti bu cür ali mükafatla təltif etdiyiniz üçün rektora, rektorluğa və instituta minnətdarlığını çatdırmağımı xahiş etdi".

Milli İncəsənət Muzeyinin rəhbəri kimi Çingiz Fərzəliyev müasir Azərbaycan ərazisində tətbiqi və təsviri incəsənətin inkişaf mərhələlərini özündə əks etdirən, analoqu olmayan "Azərbaycan incəsənəti minilliklər boyu" sərgisini qurmuş və tamaşaçılara təqdim etmişdir. Sərgiyə hazırlıq hərtərəfli idi: respublikanın rayonlarına çox saylı ekspedisiyaların təşkili, bölgələrdəki muzeylər, eləcə də şəxsi kolleksionerlərlə əlaqələrin qurulması, eksponatların dəqiqliklə analizi və atributsiyası. Çingiz Fərzəliyev Azərbaycanın görkəmli incəsənət xadimlərinin əlamətdar tarixlərinə həsr olunmuş sərgilərlə yanaşı, xarici muzeylərlə əməkdaşlıq edərək dünya incəsənətini özündə əks etdirən çox saylı sərgilərin də kuratorudur.

Çingiz Fərzəliyevin aktiv yaradıcılıq fəaliyyəti bir çox fəxri adlarla təltiflənmişdir: Rusiya Rəssamlıq Akademiyasının Fəxri üzvü, Özbəkistan Rəssamlıq Akademiyasının Fəxri professoru, Gürcüstan Rəssamlıq Akademiyasının Fəxri doktoru, Kembric Universitetinin Beynəlxalq Bioqrafik İnformasiya Mərkəzinin Fəxri professoru.

Çingiz Fərzəliyev bir çox orden və mükafatların sahibidir: Kembric Universitetinin Beynəlxalq Bioqrafik İnformasiya Mərkəzinin "İncəsənətdə görkəmli şəxsiyyət" mükafatı, Avstriya Respublikası qarşısındakı xidmətlərinə görə "Böyük Şərəf Ordeni",  Gürcüstanın "Şəfəq" prezident ordeni.

Çingiz Fərzəliyev hər növbəti fəxri ad və ya mükafatla təltif olunarkən bu nailiyyəti böyük şərəf hissi duyaraq rəhbərlik etdiyi Azərbaycan Milli İncəsənət Muzeyi kollektivinin səmərəli iş fəaliyyətinin nəticəsi olduğunu vurğulayır. Bu mükafatlar tarixi ilə qürur duyduğu Azərbaycan mədəniyyətinin dünyada təbliğində və daha yaxından tanıtmasında, eyni zamanda Azərbaycan vətəndaşlarının maariflənməsində mühüm addım hesab edilə bilər.

 
 

Azərbaycan Milli İncəsənət Muzeyində "Maarifləndirmə ayı"na start verildi

2 aprel  dünyada Beynəlxalq Uşaq Kitabı Günü kimi qeyd olunur. Bu bayram 1967-ci ildən eyniadlı beynəlxalq şuranın qərarıyla qeyd olunmağa başlayıb. Bu tarix təsadüfən seçilməyib, məhz bu tarixdə uşaq ədəbiyyatının inkişafında əvəzsiz rolu olan görkəmli danimarkalı yazıçı Hans Xristian Andersen anadan olub. Həmin gün bütün balacalara və böyüklərin əksəriyyətinə kitab oxumağın vacibliyi barədə danışılır. Həyatımızda ilk dərk edilmiş əsər məhz uşaq kitabı olur və çox şey onun keyfiyyətindən asılıdır. Kitab insanın bir şəxsiyyət kimi formalaşmasında əhəmiyyətli dərəcədə rol oynayır.

Hər il 1996-cı ildən etibarən 23 aprelin "Ümumdünya Kitab və Müəlliflik Hüququ Günü" kimi qeyd edilir. "Ümumdünya Kitab və Müəlliflik Hüququ Günü" YUNESKO-nun 15 noyabr 1995-ci ildə keçirilən 28-ci sessiyasında elan edilmişdir (3. 18 saylı qətnamə). Bu qərar mədəni ənənələrinin inkişafı və maarifləndirilməsi məqsədilə, eləcə də kitabın biliyi intişar etdirən mühüm və onun saxlamasında ən etibarlı vasitə olduğunu nəzərə alaraq qəbul edilib. Qətnamədə həmin gün kitab sərgi və yarmarkalarının keçirilməsinin səmərəliliyi barədə bildirilir.

Azərbaycanda kitab mütaliəsinin intişarının vacibliyi və əhəmiyyətini nəzərə alaraq, kitab mütaliəsi prosesinə, o cümlədən də kitab mədəniyyətinə, böyüklərin və xüsusilə də uşaq auditoriyasının cəlb edilməsi məqsədilə Azərbaycan Milli İncəsənət Muzeyi yuxarıda qeyd edilən Kitab Gününə həsr olunan beynəlxalq proqram və aksiyalara qoşulur. Bu fəaliyyətin mühüm əhəmiyyətini vurğulamaq məqsədilə muzey “Maarifləndirmə Ayı”nın başlanmasını elan edir. Bu proqram çərçivəsində ziyarətçilərimiz müxtəlif mövzularda - kitab çapı, bərpası, qorunub saxlanılması və onun tarixi haqqında, eləcə də illüstrasiyalar barədə spesifik elmi məlumatlar əldə edə bilərlər. Aprel ayının 7-si  189-190 N-li tam orta ümumtəhsil məktəbinin şagirdlərin iştirakıyla ilk tədbirimiz keçirildi.

Kitab tarixi haqqında ümümi məlumat əldə etdikdən, sonra qonaqlarımız xüsusi təşkil olunmuş tematik sərgi ilə tanış oldular. Sərgidə ilk dəfə muzey kolleksiyasının fəxri olan və kitab çapı mərhələsindən baradə bəhs edən nadir muzey eksponatları – qədim Misir papirusu, nəfis Quranlar, miniatür və xəttatlıq sənətinin şah əsərləri, Çin kitab nümunələri, yazı ləvazimatları və kitabların saxlamaq üçün istifadə olunan əşyalar, Şərq ədəbiyyatının motivləri əsasında yaradılmış bədii tikmələr və süjetli xalçalar nümayiş olunur.

Maarifləndirmə Ayının açılışının qeyd edilməsi ilə əlaqədar qonaqlar Qara Qarayev adına Mərkəzi İncəsənət Məktəbinin uşaq kollektivinin ifasını dinlədilər. Biz məktəbin rəhbərliyinə və gənc musiqiçilərimizə gözəl ifalarına görə dərin minnətdarlığımızı bildiririk! Daha sonra uşaqlar muzeyin Elmi-bərpa şöbəsinin təcrübəli əməkdaşı Səkinə Manafova tərəfindən kitab “xəstəliyi”, onların bərpası və konservasiyası mərhələləri barədə məlumat əldə etdilər. Ekskursiya və kitab çapının tarixinə səyahətdən, sonra xatirə olaraq uşaqlar rəngli kağızlardan əlfəcinlər hazırladılar.

Qeyd edək ki, “Maarifləndirmə Ayı” boyunca Azərbaycan Milli İncəsənət Muzeyində Kitab Gününə həsr olunmuş həftəlik tədbirlərin keçirilməsi planlaşdırılır.

 
 

Azərbaycan Milli İncəsənət Muzeyi və Ukraynanın Taras Şevçenko adına Milli Muzeyi arasında skayp vasitəsilə virtual görüş keçirildi

7 aprel 2017-ci il tarixində Azərbaycan Milli İncəsənət Muzeyi və Ukraynanın Taras Şevçenko adına Milli Muzeyi arasında skayp vasitəsilə virtual görüş keçirildi. Görüşdə elmi işlər üzrə direktor müavini Marta Lopatiç, Beynəlxalq Muzeylər Şurası (İCOM) Azərbaycan Milli Komitəsinin fəal üzvləri və Azərbaycan Milli İncəsənət Muzeyinin əməkdaşları iştirak etdilər. Ukraynanın Taras Şevçenko adına Milli Muzeyinin əməkdaşı tərəfindən muzeyin ekspozisiyası üzrə eksursiya aparıldı.Daha sonra iştirakçılar arasında fikir mübadiləsi aparıldı.
Qeyd edək ki, 2016-ci ilin dekabr ayında Azərbaycan Milli İncəsənət Muzeyi və Ukraynanın Taras Şevçenko adına Milli Muzeyinin direktorları Çingiz Fərzəliyev və Dmitri Stus arasında birgə əməkdaşlıq müqaviləsi imzanlanmışdır.

 
 

Muzeydə "Ailə festivalı" tədbirinin ikinci buraxılışı keçirildi

Azərbaycan Milli İncəsənət Muzeyində 10-12 mart tarixlərində Azərbaycan Respublikasının Mədəniyyət və Turizm Nazirliyinin dəstəyi, muzeyin və Əsli Səmədovanın müəllifi olduğu "Milli İrsimiz" layihəsinin birgə təşəbbüsü ilə "Ailə festivalı” tədbirinin ikinci buraxılışı keçirildi.

Bu yeni təşəbbüs muzey məfhumunun sərhədlərini genişləndirərək, onu ailəvi istirahət üçün maraqlı məkana çevirmək məqsədi daşıyır. “Ailə festivalı”nın keçirilmə ideyası mədəni vakuumun doldurulmasında və ölkəmizdə ailəvi asudə vaxtın mədəni və əyləncəli keçirilmə məkanı kimi muzeylərin məşhurlaşmasında ilk addım olacaq.

Festivalın ikinci buraxılışı üçün, xüsusi olaraq AMİM-in əməkdaşları və dəvət olunmuş qonaqlar ( Xalq rəssamı Arif Hüseynov, nağıl müəllifləri Kamran Əlioğlu və Fərid Qorxmazoğlu, Fəridə Mustafayeva, Oksana Sergeyeva, rəssam Aydan Məmmədova) və təşkilatlar (“Çələbi brendi”, “Rəsm” zərgərlik brendi, “Kilimçi” klubu, “Sevimli Bala” uşaq klubu, “Family-Tram” portalı )uşaq və valideyn cütlüyünün birgə fəaliyyəti üçün maraqlı fəallıqlar və ustad dərsləri təqdim olundu. Muzeyin Elmi-kütləvi işlər şöbəsinin bələdçiləri muzey kolleksiyası barədə 20 dəqiqəlik mini interaktiv ekskursiyalar təşkil olunub. Proqram çərçivəsində muzeyin daimi sərgisi “Azərbaycan incəsənəti minilliklər boyu” üzərində qurulmuş və Nyu-York Müasir İncəsənət Muzeyinin əməkdaşlarının dəstəyi ilə yaradılan “Rəsmə çevril”, “Xatırlayıram-xatırlamıram”, “Ov-foto”, “Fərqi tap” kimi oyunlar keçirilib.

 
 

Novruz bayramına həsr edilmiş konsert

18 mart tarixində Azərbaycan Milli İncəsənət Muzeyində Novruz bayramına həsr edilmiş konsert keçirildi. Konsertdə Bülbül adına orta ixtisas musiqi məktəbinin şagirdlərinin ifasında bayram əhval-ruhiyyəli musiqilər səsləndirildi. 
Böyük zövqlə dinlənən konsertdə görkəmli bəstəkarlar Ü.Hacıbəyovun “Cəngi”, Şopenin “Vals”, F. Əmirovun “Məhəbbət rəqsi”, T. Quliyevin “Bahar nəğməsi” kimi görkəmli dünya və Azərbaycan bəstəkarlarının kompozisiyaları və xalq mahnıları səsləndirildi. Şagirdlərin ifasındakı Ü. Hacıbəyovun “Cəngi”, S. Ələsgərovun “Şalaxo” musiqiləri və “Məhbubəm” xalq mahnısı tamaşaçılar tərəfindən xüsusi rəğbətlə qarşılandı. Tədbirdə surpriz olaraq şagirdləri ilə birgə Bülbül adına orta ixtisas musiqi məktəbinin direktoru, Xalq artisti Teymur Göyçayev da çıxış etdi. 
Konsert proqramı başa çatdıqdan sonra tədbirdə iştirak edən “Total” şirkətinin Azərbaycan üzrə icraçı direktoru Denis Lemarşal hər kəsi Novruz bayramı münasibətilə təbrik etdi və məktəb şagirdlərinin ifalarını yüksək qiymətləndiyini bildirərək, onlara yaradıcılıq uğurları arzuladı. “Total” şirkətinin Azərbaycan üzrə icraçı direktoru Denis Lemarşal qonaqları ilə birgə “Azərbaycan incəsənəti minilliklər boyu” adlı muzeyin daimi sərgisi ilə tanış oldular.

 
 

Muzeydə Novruz bayramı münasibətilə bayram şənliyi keçirilib

18 mart tarixində Azərbaycan Milli İncəsənət Muzeyində baharın gəlişi-Novruz bayramı  münasibətilə xeyriyyə məqsədli bayram şənliyi keçirildi. Tədbirin bədii hissəsində AMK tərkibində İncəsənət Gimnaziyasının şagirdlərinin iştirakı ilə konsert proqramı təqdim olundu. Giriş sözü ilə tədbiri açan Azərbaycan Milli İncəsənət Muzeyinin İctimai əlaqələr üzrə direktor müavini Qəmər Məlikova qonaqları salamyaraq, hər kəsi bayram münasibətilə təbrik etdi. Daha sonra AMK tərkibində İncəsənət Gimnaziyasının direktoru Aytən Əhmədova öz bayram təbrikini çatdırdı. 
Xeyriyyə məqsədilə keçirilən tədbirdə Sabunçu rayonunda yerləşən Valideyn himayəsindən məhrum olmuş uşaqlar üçün 1 nömrəli tam orta internat məktəbi və Xəzər rayonunda yerləşən Sağlamlıq imkanları məhdud uşaqlar üçün 12 nömrəli xüsusi internat məktəbinin uşaqları muzeyin qonağı oldular. 
Bayram şənliyində İncəsənət Gimnaziyasının şagirdlərinin ifasında biri-birindən maraqlı səhnəciklər, bayram ovqatı tərənnüm olunan şən mahnılar, rəqslər ifa edildi. Uşaqlara bayram sovqatı - Novruz xonçası təqdim edildikdən, sonra muzeyin zəngin ekspozisiyası üzrə uşaqlar üçün xüsusi hazırlanmış interaktiv ekskursiya təşkil edildi. Onlar gözəl təəssüratlarla muzeydən ayrıldılar.

 
 

Muzeydə çərşənbə axşamları qeyd olunub

Azərbaycan Milli İncəsənət Muzeyi hər həftənin ikinci günləri qədim xalq inanc və ənənələrinə sadiq qalaraq təbiətin dörd – Su, Od, Hava və Torpaq – ünsürünü özündə əks etdirən çərşənbə axşamlarını rəngarəng bayram proqramı ilə qeyd etmişdir. 
Hər həftənin ikinci günü zəngin, maraqlı, maksimum dərəcədə informativ proqramın keçirilməsi məqsədi ilə qədim xalq inanc və Novruz adətlərini əks etdirən etnoqrafik materialların təqdimatı; ixtisaslaşdırılmış pedaqoqların rəhbərliyi altında təbiət ünsürləri ilə bağlı fiziki və kimyəvi elmi eksperimentlərin keçirilməsi; milli mədəniyyətimizi əhatə edən və hər ünsürlə bağlı olan xüsusi hazırlanmış və uşaqlar üçün adaptasiya edilmiş interaktiv ekskursiyanın təşkili və müxtəlif materiallardan muzey artefaktlarının surətlərinin əyləncəli ustad dərslərində hazırlanması kimi bir neçə vacib elementləri özündə birləşdirən individual proqram tərtib edilmişdir. Həmçinin uşaq musiqi kollektivləri öz çıxışları ilə çərşənbə axşamlarına xüsusi rəng qatmışdır.
İlk gündən bayram proqramımız balaca tamaşaçılarımız tərəfindən böyük sevgi ilə qarşılanmışdır. Bayram ilə əlaqədar uşaqların milli irsə nəinki mənəvi, eləcə də fiziki tərəfdən toxuna bilməsi və mənimsəməsi məqsədilə müvəqqəti ekspozisiya qurulmuşdur. Hər bir uşaq hazırladığı muzey artefaktlarının surəti ilə, ən əsas da milli irsə böyük sevgi, hörmət və qürur hissi duyaraq gözəl təəssüratlarla muzeydən ayrılmışdır.

 
 

Səhifə 1 > 13-dəan