Tədbirlər

Milli Musiqi Günü

18 sentyabr “Üzeyir musiqi günü” hər il ölkəmizdə təntənəli şəraitdə qeyd edilir. Bu mötəbər gün 1995-ci ildən ümummilli lider Heydər Əliyev tərəfindən “Üzeyir musiqi günü” kimi rəsmiləşdirib. Dünya musiqi xəzinəsinə parlaq incilər bəxş edən Üzeyir Hacıbəyov Azərbaycanda peşəkar musiqinin banisi, bəstəkarlıq məktəbinin, musiqili komediya janrının yaradıcısıdır. Dünya musiqisinə ölümsüz əsərlər bəxş edən dahi Üzeyir Hacıbəyov Şərqdə ilk operanı, operettanın əsasını qoymuş və eyni zamanda Azərbaycanda simfonik orkestri yaradıcısı və dövlət xorunun yaradıcısıdır. Üzeyir Hacıbəyovun yaradıcılığının ən möhtəşəm səhifəsi , bəstəkar Azərbaycan Dövlət himninin müəllifi olmasıdır. Bu gün Azərbaycan bayrağı məhz həmin himnin sədaları altında dünyanın ən mötəbər salonlarında ucalır, səhərlərimiz, həmçinin bütün tədbirlərimiz bu himnin sədaları ilə başlayır. Üzeyir musiqisinin bənzərsizliyindən və ölümsüzlüyündən, xalqın, dövlətin isə qədirbilənliyindəndir ki, hər il sentyabrın 18-də keçirilən keçirilən Üzeyir Musiqi Günləri ənənə halını alıb.

Bu il də “Üzeyir musiqi günü” münasibəti ilə 17 sentyabr Azərbaycan Milli İncəsənət Muzeyində tədbir keçirilmiş, Şuşadan gətirilmiş, güllələnmiş heykəllər üzərinə qızıl güllər və tər qərənfilər düzülmüşdür. Tədbirdə Azərbaycan Mədəniyyət və Turizm naziri Əbülfəz Qarayev və nazirliyin əməkdaşları, muzey və ictimaiyyətin nümayəndələri iştirak etmişlər.

 
 

Yerusəlimdən sevgi ilə

Azərbaycan və İsrail arasında mədəni əlaqələrin daha da inkişafı, mədəniyyət mübadiləsinin güclənməsi məqsədilə Azərbaycan Milli İncəsənət Muzeyi və “Aziz” Beynəlxalq İsrail-Azərbaycan Assosiasiyasının birgə təşkilatçılığı ilə Azərbaycan Milli İncəsənət Muzeyinin 80 illik yubileyi çərçivəsində gənc ifaçılar Miriyam Hacıyeva və Yadid Şvarçın “Yerusəlimdən sevgi ilə” adlı klassik musiqi gecəsi keçirilirdi.

Konsertdə dünya bəstəkarları Cakoma Puççininin “Bohema” operasından Musettanın “Quando m'en vo” ariyası, Lüdoviq van Bethovenin “Beşinçi sonatası”, Volfqanq Amadey Motsartın “Hökmdar çoban” operasından Amintanın “L’amero, saro costante” ariyası, Şarl Fransua Qunonun “Romeo və Culyetta” operasından Julyettanın “Je veux vivre” ariyası, Kleman Filiber Leo Delibin “Les filles de Cadix” vokal əsəri, Sergey Raxmaminovun “Zdes xoroşo” və “Ne poy krasavitsa pri mne” romansları, Nikolay Andreyeviç Rimskiy-Korsakovun “Plenivşis rozoy solovey” romansı, Rixard Ştrausun “Morgen” və “Cacilie” əsərləri, Frtis Kreyslerin “Liebesfreud” və “Liebesleid”, “Şon Razmarin” pyesləri, Niyazinin “Arzu” romansı və Moşe Rappaportun “Çalamti et şirat hazamir” əsəri səsləndi.

 
 

Azərbaycan Milli İncəsənət muzeyinin direktoru, Azərbaycan Dövlət Rəssamlıq Akademiyasının professoru Çingiz Fərzəliyevə Gürcüstanın Dövlət mükafatı “Şəfəq” ordeni təqdim edilmişdir

13 may 2016-cı ildə Gürcüstan Milli Muzeyində Azərbaycan Milli İncəsənət muzeyinin direktoru, Azərbaycan Dövlət Rəssamlıq Akademiyasının professoru Çingiz Fərzəliyevə Azərbaycan-Gürcüstan arasındakı  incəsənət və mədəni əlaqələrin möhkəmləndirilməsi və inkişafına verdiyi töhfələrə görə təntənəli şəkildə Gürcüstanın Dövlət mükafatı “Şəfəq” ordeni təqdim edilmişdir.

“Şəfəq” ordeni mədəniyyət, təhsil, elm, incəsənət, idman və digər sahələrin  görkəmli nümayəndələrinin yüksək nailiyyətlərinə görə təltif olunması üçün Gürcüstan Parlamenti tərəfindən 31 iyul 2009-cu ildə təsis edilmişdir.

Təltif olunanlar sırasında,  Gürcü Patriarxı II İlya,  SSRİ xalq artisti  Nani Breqvadze, Opera və Balet teatrının rəhbəri Gürcüstan SSR və Rusiya xalq artisti, balerina Nino Ananiaşvili, SSRİ xalq artisti Oleq Basilaşvili, amerikalı iş adamı və siyasi xadim Donald Tramp, SSRİ  əməkdar idman ustası Arvidas Sabonis, Gürcüstan  Milli muzeyinin direktoru David Lordkipanedze və digər görkəmli şəxsiyyətlər  də var.

“Şəfəq” ordenini Professor Çingiz Fərzəliyevə Gürcüstan Prezidentinin müşaviri Sofya Şamanidi  tərəfindən təqdim edilmişdir. Çingiz Fərzəliyev təltifə və xidmətlərinin yüksək qiymətləndirilməsinə görə Prezident Georgi Marqvelaşviliyə təşəkkürünü bildirmişdir. Qeyd etmişdir ki, Azərbaycan Respublikasının prezidenti tərəfindən 2016-cı ilin multikulturailizm ili elan olunması baxımından  bu mükafat, onun üçün xüsusilə dəyərlidir. Eyni zamanda rəhbərlik etdiyi Azərbaycan Milli İncəsənət muzeyi  bu il 80 illik yubileyini qeyd edir.

Təqdimat mərasimində: Gürcüstanın Mədəniyyət və Abidələrin mühafizəsi naziri Nikoloz Rurua, Gürcüstan Milli muzeyinin direktoru David Lordkipanidze, Gürcüstanın keçmiş Mədəniyyət naziri ”Azərbaycan-Gürcüstan” assosiasiyasının prezidenti Valeri Asetiani, Azərbaycan Respublikasının Gürcüstandakı səfiri Azər Hüseyn, Gürcüstan Parlamentinin deputatı Azər Süleymanov, SOCAR Georgiya Petroleumun baş direktoru  Mahir Məmmədov, M. F. Axundovun Tblisidəki  ev muzeyinin direktoru Leyla Əliyeva, həmçinin  Gürcüstanın digər görkəmli mədəniyyət, incəsənət və ictimai xadimləri iştirak etmişdirlər.

 

 
 

“Barokko dövrünün musiqisi” adlı konsert

7 mart 2016-cı il tarixində  saat 17:00-da  Azərbaycan Milli İncəsənət Muzeyində  Azərbaycan Milli İncəsənət Muzeyi və Ü.Hacıbəyli adına Bakı Musiqi Akademiyasının birgə layihəsi silsiləsindən növbəti tədbir keçirilir. Bakı Musiqi Akademiyasının professoru Leyla Məmmədəliyevanın rəhbərliyi ilə gerçəkləşəcək  “Barokko dövrünün musiqisi” adlı konsert Azərbaycan Milli İncəsənət Muzeyinin 80 illik yubileyi və 8 Mart Beynəlxalq Qadınlar gününə həsr olunur.  Qeyd edək ki, bu Azərbaycan Milli İncəsənət Muzeyinin 80 illik yubiley tədbirləri çərçivəsində təşkil olunan ilk tədbirdir.

 
 

Qabriell Stravelli

 

 

 

 

 

 

ABŞ Səfirliyi 14-18 noyabr tarixlərində Amerikacaz ifaçısı Gabrielle Stravellinin Azərbaycana ilk səfərini sponsorluq edirik. Azərbaycanda olarkən Qabriell Stravelli və onun qrupu müxtəlif açıq konsertlər verəcək və yerli musiqiçilər üçün ustad dərsləri keçirəcəklər. Gabrielle Stravellinin Azərbaycanda keçirilən bütün konsert proqramları pulsuzdur və geniş ictimaiyyət üçün açıqdır. ABŞ Səfirliyi canlı Amerika caz musiqisi ilə maraqlanan hər bir kəsi aşağıdakı tədbirlərdə iştirak etməyə dəvət edirik:

14 noyabr - 18:30-19:40 Park Bulvarda konsert
16 noyabr - 14:30-15:40 Xəzər Universitetində konsert 
17 noyabr - 18:00-19:00 Milli İncəsənət Muzeyində pulsuz tur
17 noyabr - 19:00-20:30 Milli İncəsənət Muzeyində konsert 
18 noyabr - 19:00-20:00 - YARAT Müasir İncəsənət Məkanında Amerika Caz Musiqisinin tarixi mövzusunda təqdimat
18 noyabr - 20:00-21:30 - YARAT Müasir İncəsənət Məkanında konsert

Müxtəlif mükafatlar qazanmış Qabriell Stravelli hər özünün original mahnılarının ifası, yeni Amerika mahnılarının ifasi həmdə və Dyuk Ellington, Dolli Parton və Conni Merser kimi müsiqiçilərin standrtlarının nümayişi sahəsində dinləyicilərin rəğbətini qazanmışdır. Aktyor olan Qabriell lirikasında Deyvid Finklinin “fərdi expressiyanın təcəssümü” adlandırdığı bir xüsusi həssaslığa malikdir. Qabriell bu yaxında Nyu Yorkun Metropolitan zalında Nyu York Tayms, Vall Strit Cornal və Haffington Post da daxil olmaqla mətbuatın tərifini qazanmış solo ifalar etmişdir.Keçən payız o Uinton Marsalis və Linkoln Mərkəzinin Orkestrı ilə ABŞ-da turneyə getmiş və Marsalisin Abissinian: İncil Bayramını ifa etmişdir. Qabriel Stravelli və onun qrupu ABŞ-ın Dövlət Departamentinin Amerika Musiqisinin xaricdə Təbliği proqramı çərçivəsində Azərbaycana ilk dəfədir səfər edir. Sözügedən proqram tanınmış Amerika musiqiçilərinin digər ölkələrə səfərini nəzərdə tutaraq mədəniyyət sahəsində anlayışı və əməkdaşlığı inkişaf etdirir.

 
 

"Sülh naminə Daş"

Yaponiyanın Sülh naminə Daş Xirosima Assosiasiyası və bu ölkənin "Kyodo News" informasiya agentliyi dünyada sülhün təbliği məqsədilə "Sülh naminə Daş" adlı xatirə simvolunu Azərbaycan Respublikasına hədiyyə edib. Oktyabrın 16-da Azərbaycan Milli İncəsənət Muzeyində xatirə simvolunun təqdimat mərasimi keçirildi.  Mərasimdə çıxış edən mədəniyyət və turizm naziri Əbülfəs Qarayev bildirdi ki, II Dünya müharibəsinin sonunda Yaponiyanın Xirosima şəhərinə nüvə bombasının atılması bəşəriyyət tarixində ən böyük faciələrdən biridir. 200 mindən artıq insanın həlak olduğu həmin faciədən 70 il keçsə də, hələ də acı nəticələri yaşanmaqdadır. Yalnız 1960-cı ildə Xirosima şəhəri bərpa olunaraq normal həyata qayıda bildi. Yaponiya dövləti Xirosimanı sülh şəhəri elan etdi. Yaponiyanın Sülh naminə Daş Xirosima Assosiasiyası 1991-ci ildən dünyada sülh naminə müxtəlif layihələr həyata keçirir.  Nazir qeyd etdi ki, bu gün Azərbaycan Milli İncəsənət Muzeyinə təqdim edilən xatirə simvolu ilə bağlı layihə dünyanın bir sıra ölkələrində reallaşdırılıb. Xirosima şəhərinin dağıntıları altından çıxarılan daşlar dünyanın müxtəlif ölkələrində muzeylərdə yerləşdirilərək sülhə çağırış rəmzi daşıyır: "Azərbaycana təqdim edilən nümunənin də əhəmiyyəti var. Çünki xalqımız 25 ilə yaxındır ki, müharibə, hərbi təcavüzlə üzləşib, torpaqlarımız uğrunda çoxlu sayda qurbanlar verib. Biz müharibənin dəhşət və faciəsini yaşayan xalqlardan biriyik. Amma ölkə rəhbərliyinin apardığı siyasət daim sülhə yönəlib. Biz bu xatirə daşını muzeydə yerləşdirməklə buranı ziyarət edən hər kəsin sülhü düşünməsini istərdik. Layihənin Azərbaycanda reallaşdırılmasına görə ölkəmiz adından Yaponiya dövlətinə təşəkkürümüzü bildiririk".  Mərasimdə çıxış edən Yaponiyanın Azərbaycandakı səfiri Tsuquo Takahaşi, Yaponiyanın Sülh naminə Daş Xirosima Assosiasiyasının rəhbəri Michio Umemoto layihənin həyata keçirilməsi üçün yaradılan şəraitə görə Azərbaycan dövlətinə təşəkkürünü bildirdi. Çıxışlarda Yaponiya və Azərbaycan arasında mədəni, siyasi, iqtisadi əlaqələrin inkişaf etdiyi vurğulanaq sıx əməkdaşlıqdan məmnunluq ifadə edildi.
Sonra "Sülh naminə Daş" xatirə simvolunun açılışı oldu. Xatirə simvolunun rəsmi sənədləri Azərbaycan Respublikası Baş nazirinin müavini Elçin Əfəndiyevə təqdim edildi.  Mərasimdə dövlət və hökumət rəsmiləri, Yaponiyanın Sülh naminə Daş Xirosima Assosiasiyasının və "Kyodo News" informasiya agentliyinin nümayəndə heyəti, Bakıda akkreditə olunmuş diplomatik korpus təmsilçiləri iştirak edirdilər.  Xatırladaq ki, II Dünya müharibəsinin son günlərində, 1945-ci ilin 6 avqustunda ABŞ hərbi aviasiyası tərəfindən Yaponiyanın Xirosima, 9 avqustda isə Naqasaki şəhərlərinə atom bombası atılıb. On minlərlə dinc insan misli görünməmiş dəhşətli faciənin qurbanına çevrilib. Xirosima və Naqasaki qurbanlarının xatirəsi hər il Yaponiyada dərin hüznlə yad edilir.  Azərbaycanla bərabər artıq bir çox ölkələrə hədiyyə edilmiş xatirə simvolu əbədi sülh arzulayaraq dua edən Kanon ilahəsinin monolit yonulmuş barelyefi şəklindədir.

Fotoqraf: Ələkbər Ağasiyev

 
 

Azərbaycan Milli İncəsənət Muzeyində təqdimat mərasimi

Yaponiyanın “Hiroşima Sülh naminə Daş Assosiasiyası” təşkilatı və Yaponiyanın “Kyodo News” informasiya agentliyi dünyada sülhün təbliği məqsədilə “Sülh naminə Daş” adlı xatirə simvolunu Azərbaycan Respublikasına hədiyyə etmişdir. Mədəniyyət və Turizm Nazirliyinin təşkilatçılağı ilə 2015-ci ilin 16 oktyabr tarixində saat 12.00-da Azərbaycan Milli İncəsənət Muzeyində Yaponiyanın “Sülh naminə Daş Assosiasiyası” təşkilatı tərəfindən Azərbaycan Respublikasına hədiyyə edilmiş “Sülh naminə Daş” adlı xatirə simvolonun təqdimat mərasimi keçiriləcəkdir. Təqdimat mərasimində respublikanın dövlət və hökümət rəsmiləri, Yaponiyanın “Sülh naminə Daş Hirosima Assosiasiyası” təşkilatı və Yaponiyanın “Kyodo News” informasiya agentliyinin nümayəndə heyəti, habelə Bakı şəhərində akkreditə olunmuş diplomatik missiyaların rəhbərləri iştirak edəcəklər. 1945-ci ilin 6 avqustunda Yaponiyanın Hiroşima şəhərinin səmasında atom bombası partladı. Minlərlə dinc insan bu vaxta qədər görünməmiş dəhşətli faciənin qurbanına  çevrildi. Artıq bu faciədən 70 il ötməsinə baxmayaraq, onun yaratdığı fəsadları hələ də bir çox insanlar öz üzərində daşıyırlar. Xirosima qurbanlarının xatirəsi hər il Yaponiyada dərin hüznlə yad edilir. Azərbaycanla bərabər artıq bir çox ölkələrə hədiyyə edilmiş daş üzərində təsvir edilən əbədi sülh arzulayaraq dua edən Kanon ilahəsi monolit yonulmuş relyefli baş şəklindədir.  İlahənin obrazı ¾ sağa doğru çevrilmiş, budda ikonoqrafiya incəsənəti ənənəsində, çiyininə tökülmüş şinyonla bəzədilmiş saçları üzərində yoqa duruşunda Buddanın təsviri yonulmuş, qulaqlarında dairəvi sırqalar, sinəsi 9 iri dairəvi muncuqlarla bəzədilmişdir. “Sülh naminə Daş” adlı xatirə simvolunun Azərbaycan Milli İncəsənət Muzeyinin daimi ekspozisiyasına daxil edilməsi atom faciəsi qurbanlarına hörmət rəmzi olmaqla yanaşı Azərbaycan-Yapon mədəni əlaqələrinin inkişafına yeni töhfədir.

 
 

Fransanın ölkəmizdəki fövqəladə və səlahiyyətli səfiri Paskal Mönye diplomatik fəaliyyətinin başa çatması ilə əlaqədar olaraq Azərbaycan Milli İncəsənət Muzeyində olmuş, muzeyin direktoru professor Çingiz Fərzəliyevlə görüşmüşdür

1 oktyabr 2015-ci il tarixində Fransanın ölkəmizdəki fövqəladə və səlahiyyətli səfiri Paskal Mönye diplomatik fəaliyyətinin başa çatması ilə əlaqədar olaraq Azərbaycan Milli İncəsənət Muzeyində olmuş, muzeyin direktoru professor Çingiz Fərzəliyevlə görüşmüşdür. Görüş zamanı ölkəmizdən və xalqımızdan xoş təəssüratla ayrıldığını deyən səfir Paskal Mönye gələcək fəaliyyəti dövründə də Fransa-Azərbaycan mədəni əlaqələrinin genişləndirilməsi istiqamətində səylərini əsirgəməyəcəyini bildirmişdir.  Çingiz Fərzəliyev də öz növbəsində Paskal Mönyenin ölkəmizdəki diplomatik fəaliyyəti dövründə ikitərəfli mədəni əlaqələrin inkşafındakı rolunu xüsusilə qeyd edib və səfirə gələcək fəaliyyətində uğurlar azrulamışdır.

 

 

 

 

 

 

 

 

 

 

 

 

 
 

Səhifə 4 > 14-dəan