Tədbirlər

Kazım Kazımzadənin 100 illik yubileyinə həsr olunmuş xatirə günü

14 aprel 2015-ci il tarixində Xalq rəssamı Kazım Kazımzadənin 100 illik yubileyinə həsr olunmuş xatirə günü keçirilmişdir. Tədbirdə rəssamın fərdi yaradıcılıq sərgisi, həmçinin sənətşünaslıq üzrə fəlsəfə doktoru Sevil Kərimovanın müəllifi olduğu “Kazım Kazımzadə” adlı kitabın təqdimatı olmuşdur.

Foto: Ələkbər Ağasiyev

 
 

Polşa Respublikasının Azərbaycandakı səlahiyyətli səfiri cənab Marek Tsalkanın Azərbaycan Milli İncəsənət Muzeyinə ziyarəti

14 aprel tarixində Polşa Respublikasının Azərbaycandakı fövqaladə və səlahiyyətli səfiri cənab Marek Tsalkan Azərbaycan Milli İncəsənət Muzeyini ziyarət etmişdir. Səfir “Azərbaycan incəsənəti minilliklər boyu” sərgisi ilə tanış olmuş, eyni zamanda muzey rəhbərliyi ilə görüşmüşdür. Muzeyin direktoru professor Çingiz Fərzəliyevlə görüş zamanı Azərbaycan-Polşa arasında incəsənət yönümlü əlaqələrin yaradılmasının, muzey mütəxəssislərinin təcrübə mübadiləsinin mümkünlüyü, “Polşaya xoş gəlmişsiniz” adlı sərginin təşkili kimi məsələlər müzakirə olunmuşdur.

Foto: Ələkbər Ağasiyev

 
 

London şəhərində yerləşən dünya şöhrətli Viktoriya və Albert Muzeyinin direktoru cənab Martin Rotun Azərbaycan Milli İncəsənət Muzeyinə ziyarəti

9 aprel 2015-ci il tarixində Azərbaycan Milli İncəsənət Muzeyini İngiltərənin London şəhərində yerləşən dünya şöhrətli Viktoriya və Albert Muzeyinin direktoru cənab Martin Rot ziyarət etmişdir. Ziyarətin məqsədi Azərbaycan incəsənəti ilə tanış olmaq, milli dəyərlərimiz haqqında ətraflı məlumat almaq və əyani şəkildə onları görmək olmuşdur. Qonağa Azərbaycanın qədim dövr incəsənəti, xalqımızın min illər öncədən çağdaş dövrədək yaratdığı sənət əsərləri haqqında geniş məlumat verilmişdir. Muzeyin zəngin toplusu, orada qorunan bir çox əsərlərin bu gün bəşər mədəniyyəti nümunəsi sayıldığı fikirlərini söyləyən cənab Martin Rotun marağına eyni zamanda miniatürlər, bədii parçalar, xalçalar, ağac üzərində təsvirlər də səbəb olmuşdur. Onun silah, hərbi geyim sənətilə, istila edilmiş torpaqlarda qalan maddi-mədəniyyət abidələrimiz, Cənubi Azərbaycanda olan sənətkarlıqla bağlı suallarına muzeyin direktoru, Əməkdar incəsənət xadimi, professor Çingiz Fərzəliyev və digər əməkdaşlar ətraflı cavab vermişlər. Görüşün sonunda qonağa muzeyin kolleksiyasına həsr edilmiş kitablar hədiyyə verilmişdir. Eyni zamanda cənab Martin Rot tərəfindən böyük minnətdarlıq hissi ilə gələcəkdə Viktoriya və Albert Muzeyi ilə Azərbaycan Milli İncəsənət Muzeyi arasında sənət əsərlərinin bərpası, atribusiyası, sərgi və digər sahələrdə əməkdaşlıq işlərinin birgə həyata keçirilməsi təklifi ifadə edilmişdir. Görüşün sonunda xatirə şəkli çəkilmişdir.

Foto: Ələkbər Ağasiyev

 
 

TÜRKSOY ölkələrindən dəvət olunmuş ixtisasçılarla birlikdə muzey və arxeologiya üzrə impozium keçirilmişdir

2015 il  22-26  mart tarixində Türkiyənin Şanlıurfa şəhərində TÜRKSOY ölkələrindən dəvət olunmuş ixtisasçılarla birlikdə muzey və arxeologiya üzrə  24-cü simpozium keçirilmişdir. Artıq 24 ildir ki, bu Forum Türkiyə Mədəniyyət və Turizm Nazirliyi tərəfindən  təşkil olunur. Forumun əsas məqsədi- muzeylərdə qorunan arxeoloji materialların saxlanması, bərpası və konservasiyasıdır. Proqramın ayrılmaz hissəsindən biri də Türkiyənin qədim şəhərlərinin tarixi abidələri, arxeoloji qoruqları və muzeyləri ilə tanışlıqdır.  Azərbaycanı bu il Forumda : Azərbaycan Respublikasının Mədəniyyət və Turizm Nazirliyinin Muzey işi sektorunun aparıcı məsləhətçisi - Afaq Mahmudova, Azərbaycan Respublikası Mədəniyyət və Turizm Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Abidələrə  və tədqiqatlara nazarət sektorunun müdiri- Arif  Əliyev və Azərbaycan Milli İncəsənət Muzeyinin  Fond şöbəsinin  Arxeoloji keramika və çini bölməsinin müdiri - Fidan Muradəliyeva təmsil etmişlər. Arif  Əliyev  - “Azərbaycanda arxeoloji abidələrin tədqiqi, qorunması,bərpası və arxeoturizmin inkişafında onların rolu”, Fidan Muradəliyeva isə - “Arxeoloji qazıntı materiallarının  Azərbaycan Milli lncəsənət Muzeyində istifadəsinin müasir praktikası”  məruzələri ilə çıxış edərək, Azərbaycanda bu istiqamətdə aparılan işlər barəsində simpozium iştirakçılarını ətraflı məlumatlandırmışlar. Çıxışlar böyük maraqla qarşılanmışdır.

 
 

Təşəkkürnamə

12 mart 2015-ci il tarixində məşhur çinli rəssam Vanq Hai Qinq çəkdiyi"Gizli məna" əsərini Azərbaycan Milli İncəsənət Muzeyinə hədiyyə etmişdir. Bununla əlaqədar təşkil olunmuş mərasimdə Mədəniyyət və Turizm Nazirliyinin Muzey işi və mədəniyyət sərvətlərinə nəzarət şöbəsinin müdiri Azadə Hüseynova, muzeyin direktoru professor Çingiz Fərzəliyev və muzeyin digər əməkdaşları iştirak etmişdirlər. Çingiz Fərzəliyev qonağı salamlayaraq muzeyə hədiyyə edilən əsərə görə təşəkkürünü bildirmişdir. Öz növbəsində çinli rəssam da Azərbaycana səfər etməsindən məmnunluğunu bildirmiş və qeyd etmişdir ki, iki ölkə arasında mədəni əlaqələrin gücləndirilməsində əlimizdən gələni etməliyik.

Foto: Ələkbər Ağasiyev

 
 

Xocalı faciəsi qurbanlarının xatirəsinə həsr olunmuş musiqili ədəbi-bədii gecə

26 fevral 2015-ci il tarixində Azərbaycan Milli İncəsənət Muzeyində Azərbaycan Respublikası Prezidentinin Administrasiyası rəhbərinin “Xocalı soyqırımının iyirmi üçüncü ildönümünün keçirilməsinə dair tədbirlər planın təsdiq edilməsi haqqında”  26 yanvar 2015-ci il 6 nömrəli Sərəncamına uyğun olaraq  Xocalı faciəsi qurbanlarının xatirəsinə həsr olunmuş musiqili ədəbi-bədii gecə keçirilmişdir. Anım gecəsində Teymur Göyçayevin rəhbərliyi ilə  Bülbül adına orta ixtisas musiqi məktəbinin  şagirdlərinin ifasında bəstəkarlardan A.Zeynalli, F.Bədəlbəyli, A.Rzayev, H.Xanməmmədov, V.Adıgözəlov, F.Əmirovun  əsərlərindən ibarət musiqi parçaları  və muğamlar, xalq mahnıları və Qarabağ şikəstəsi səsləndirilmişdir.

Foto: Ələkbər Ağasiyev

 
 

Beynəlxalq muzey treninqi

2015- ci ilin aprel-may aylarında Azərbaycan Respublikası Mədəniyyət və Turizm Nazirliyinin dəstəyi ilə Azərbaycan Milli İncəsənət Muzeyi və Britaniya Şurasının əməkdaşlığı çərçivəsində Böyük Britaniyadan dəvət olunacaq muzey mütəxəssislərinin bələdçiliyi ilə Azərbaycanın paytaxt və region muzeylərində çalışan muzey mütəxəsisslərinin inkişafı, eləcə də ictimaiyyətin  muzeyə olan marağının artırılması sahəsində uzun müddətli layihənin həyata keçirilməsi nəzərdə tutulmuşdur. Bununla bağlı cari ilin fevral ayında Britaniya Şurasının Muzey, Kitabxana, Arxiv sahəsi üzrə regional məsləhətçisi Ceyn Viksi və bu sahə üzrə digər mütəxəssisi Coannna van Mil Böyük Britaniyadan Azərbaycana səfər etmişlər. Səfər çərçivəsində mütəxəsisslər 24 fevral tarixində Azərbaycan Milli İncəsənət Muzeyində ehtiyacların və boşluqların tədqiq edilməsi məqsədilə Bakının müxtəlif muzeylərində çalışan muzey əməkdaşları ilə görüşmüş və dəyirmi masa keçirmişlər. Tədbirin açılışında Azərbaycan Respublikası Mədəniyyət və Turizm Nazirinin müavini Sevda xanım Məmmədəliyeva, Böyük Britaniyanın və Şimali İrlandiya Birləşmiş Krallığının Azərbaycandakı Səfiri cənab İrfan Siddiq, Azərbaycan Milli İncəsənət Muzeyinin direktoru cənab Çingiz Fərzəliyev, Muzey işi sektorunun müdiri Azadə xanım Hüseynova ,  Britaniya Şurasının (British Council Azerbaijan) ölkə üzrə direktoru xanım Elizabet Vayt iştirak etmişdir. Tədbirin birinci hissəsinin sonunda Böyük Britaniya və Şimali İrlandiya Birləşmiş Krallığının Azərbaycandakı Səfiri İrfan Sıddıq, Britaniya Şurasının ölkə üzrə direktoru Elizabet Vayt və tədbir iştirakçıları Azərbaycan Milli İncəsənət Muzeyinin ekspozisiyası ilə yaxından tanış olmuşdurlar. 40-a yaxın muzey əməkdaşının cəlb olunduğu görüş uğurlu və səmərəli keçmişdir. Aparılan dialoq əsnasında ölkəyə səfər etmiş mütəxəsisslər muzey əməkdaşlarını maraqlandıran mövzularla tanış olmuş, mühüm məsələləri müzakirə etmiş, treninqlər (workshop) keçirilmişdir. Söylənilən fikirlər nəticəsində muzeylərin gələcək fəaliyyətlərinin gücləndirilməsi və səmərəli təlim proqramının hazırlanması üzərində işlənəcəkdir. Əminik ki, bu görüş mədəni irsimizin qorunması sahəsində gələcək layihə fəaliyyətinə öz əvəzsiz töhfəsini verəcəkdir.

foto: Ələkbər Ağasiyev

 
 

Xocalı faciəsi qurbanlarının xatirəsinə həsr olunmuş musiqili ədəbi-bədii gecə

Azərbaycan Respublikası Prezidentinin Administrasiyası rəhbərinin “Xocalı soyqırımının iyirmi üçüncü ildönümünün keçirilməsinə dair tədbirlər planın təsdiq edilməsi haqqında” 26 yanvar 2015-ci il 6 nömrəli Sərəncamına uyğun olaraq Azərbaycan Milli İncəsənət Muzeyində Xocalı faciəsi qurbanlarının xatirəsinə həsr olunmuş musiqili ədəbi-bədii gecə keçiriləcək. Anım gecəsində Teymur Göyçəyevin rəhbərliyi ilə  Bülbül adına orta ixtisas musiqi məktəbinin  şagirdləri çıxış edəcəkdir. Tədbir 26 fevral 2015-ci il tarixində, saat 15:00- da Azərbaycan Milli İncəsənət Muzeyinin Niyazi 11 ünvanında keçiriliəcək.

 
 

Səhifə 6 > 14-dəan