Tədbirlər

Hollandiya səfəri

Cari ilin yanvar ayının 21-dən 24-ə qədər Azərbaycan Milli İncəsənət Muzeyinin direktoru professor Çingiz Fərzəliyev və müzeyin elmi araşdırmalar şöbəsinin müdiri Toğrul Əfəndiyev Hollandiyada Azərbaycan Respublikasının bu ölkədəki səfiri cənab M.N.Əfəndiyevin şəxsi dəvətilə işgüzar səfərdə olmuşlar. Səfərin başlıca məqsədləri  Hollandiyanın aparıcı muzeylərinin rəhbərliyi ilə tanış olmaq və qarşılıqlı maraq doğura biləcək layihələrin həyata keçirilməsi haqqında danışıqların aparılması olmuşdur. Bu məqsədlə yanvar ayının 22-də səfirlikdə cənab səfirin birbaşa iştirakı ilə bir qrup hollandiya muzey rəhbərləri və səlahiyyətli şəxsləri ilə görüş baş vermişdir. Görüşdə Hollandiya tərəfindən  Dutch Culture - beynəlxalq mədəni əlaqələrin koordinasiyası ictimai birliyinin direktoru cənab Cees dee Graaff, Cobra-muzeyinin biznes inkişafı və əməkdaşlıq üzrə departamentinin nümayəndəsi cənab Bert Meennings, Amsterdam şəhərindəki  Rembrandtın ev-muzeyinin direktoru cənab Michael Huijser, The Holland Times qəzetinin və Azərbaycan-Niderland web platformasının kontent meneceri Arnold Utama iştirak etmişdirlər. Görüşdə aparılan fikir mübadiləsi zamanı  gələcəkdə qarşılıqlı  maraq doğura biləcək hədəf nöqtələri müəyyən edilmişdir.

Eyni zamanda Azərbaycan tərəfi yerli mütəxəssisləri Azərbaycan Milli İncəsənət muzeyinin sərgi imkanları barəsində bilgilərlə təmin etmişdir. Keçirilən sərgilər, dövlətin ali rəhbərliyinin mədəniyyətə və incəsənətə göstərdikləri diqqət və qayğı barəsində ətraflı məlumat verilmişdir. Qonaqlara şərh olunan mövzulara dair video filimlər nümayiş etdirilmiş, muzeyin nəşr etdirdiyi çeşidli çap məhsulları paylanılmışdır.

Yanvarın 23-də Çingiz Fərzəliyev və Toğrul Əfəndiyev Amsterdam şəhərində Rembrandtın ev-muzeyinə səfər etmişlər. Burada onları qarşılayan muzey direktoru və onun əməkdaşları qurumlarının fəaliyyətləri barəsində ətraflı məlumat vermişlər və qonaqları muzeyin ekspozisiyası ilə tanış etmişlər.

Muzey kolleksiyasının əsasını dahi rəssamın qrafik əsərləri təşkil etdiyindən (ofort, rəsm, qravür və s.)  belə sərgilərin daşınmasının çox  çevik və rahat olduğu başlıca amil kimi vurğulanmışdır.

Belə bir sərginin Azərbaycanda daha böyük maraq  doğurmasını təmin etmək məqsədilə mövzunun seçilməsi ətrafında ilkin fikir mübadiləsi aparılmışdır. Bu məqsədlə muzeyin rəhbərliyinin və Niderland mədəniyyət mərkəzinin müdirinin tezliklə Bakıya gəlməsi təklif olunmuşdur. Təklif böyük məmmunluqla qəbul edilmişdir.

 
 

A.S.Puşkin adına Dövlət Təsviri İncəsənət Muzeyinin direktoru Marina Loşak və həmkarları Azərbaycan Milli İncəsənət Muzeyində

25 yanvar 2015-ci il tarixində Rusiyanın A.S.Puşkin adına Dövlət Təsviri İncəsənət Muzeyinin direktoru Marina Loşak və həmkarları Azərbaycan Milli İncəsənət Muzeyinin qonağı olmuşlar. Görüşdə Azərbaycan Respublikası Mədəniyyət və Turizm Nazirliyinin muzey işi üzrə sektor müdiri Azadə Hüseynova və Azərbaycan Milli İncəsənət  Muzeyinin əməkdaşları iştirak etmişdir. Görüş əsnasında dəyirmi masa keçirilmiş, Azərbaycan Milli İncəsənət Muzeyi ilə  A.S.Puşkin adına  Dövlət Təsviri İncəsənət Muzeyi arasında gələcək əməkdaşlıq əlaqələrindən söhbət açılmışdır. Sonda qonaqlar muzeyin ekspozisiyası ilə tanış olmuşlar.

Foto: Ələkbər Ağasiyev

 
 

"National Geographic Azərbaycan"

14 yanvar 2015-ci il tarixində Azərbaycan Milli İncəsənət Muzeyində müxtəlif yönümlü elmi və aktual məqalələr, qeyri-adi foto illüstrasiyalar və xəritələr vasitəsilə mədəniyyət, təbiət, elm və texnologiya sahələrini dərindən əhatə edən məşhur "National Geographic" jurnalının Azərbaycan versiyası olan "National Geographic Azərbaycan" jurnalı ilə qarşılıqlı əməkdaşlıq çərçivəsində jurnalın baş redaktoru Seymur Teymurov, baş redaktorun müavini Seymur Məmmədli və Art-director Tariyel Kərimov ilə görüş keçirilmişdir.

Görüşdə muzeyin elmi əməkdaşlarının iştirak ilə muzeyin kolleksiyasından seçilən maraqlı və müəyyən elmi tarixə malik əsərlərin prezentasiyaından, sonra  qonaqlar  muzeyin ekspozisiyası ilə tanış olmuşlar.

Bu görüş "National Geographic Azərbaycan" jurnalı ilə əməkdaşlığın uzun müddət davam etməsində və müvafiq sahədə əlaqələrin daha da genişləndirilməsində mühüm rol oynayacaqdır.

 
 

“ArtiShok” şirkətinin birgə təşəbbüsü ilə bütün yaş qrupundan olan uşaqlar üçün intellektual-əyləncəli “Art yolka” şənlikləri

Dekabrın 26-dan 29-dək Azərbaycan Milli İncəsənət Muzeyi və “ArtiShok” şirkətinin birgə təşəbbüsü ilə bütün yaş qrupundan olan uşaqlar üçün intellektual-əyləncəli “Art yolka” şənlikləri keçirilmişdir. “Art yolka” şənliklərində uşaqlar həmişəki tədbirlərdən fərqli olaraq xüsusi bayram atmosferində peşəkar muzey əməkdaşlarının,cizgi filmləri personajlarının və nağıl qəhrəmanlarının müşayiəti ilə muzeyin maraqlı eksponatlarına tamaşa etmiş, həmçinin şənliyə daha da rəng qatan bir-birindən maraqlı müsabiqələrin iştirakçısı olmuşlar.Sonda isə uşaqlar üçün cizgi filmi nümayiş olunmuşdur.

 
 

“Aydınlığa doğru”

22 dekabr 2014-cü il tarixində Azərbaycan Milli İncəsənət Muzeyində '“Aydınlığa doğru” milli-mənəvi dəyərlərin qorunması İctimai Birliyi və Azərbaycan Milli İncəsənət Muzeyinin birgə təşəbbüsü ilə  Azərbaycan Yazıçılar Birliyi və Rəssamlar İttifaqının üzvü, yazıçı, ssenarist, sənətşünas, Əməkdar incəsənət xadimi Sara Oğuz Nəzirovanın 70 illik yubileyinə həsr olunmuş xatirə gecəsi keçirilmişdir.

Gecədə Sara xanımla bir neçə filmə imza atmış kino rejissoru, Əməkdar incəsənət xadimi Şamil Nəcəfzadənin  Sara Oğuzun çoxsahəli zəngin yaradıcılığına və həyat yoluna həsr olunmuş  sənədli filmi nümayiş etdirilmişdir.

Mərasimdə çıxış edən yazıçı - dramaturq Əli Əmirli,  kino rejissor, Əməkdar incəsənət xadimi Şamil Nəcəfzadə,teatrşünas, tənqidçi, sənətşünaslıq elmləri namizədi Aydın Talıbzadə, o cümlədən digər tanınmış ədəbiyyat, mədəniyyət və incəsənət xadimləri,qələm dostları yazıçı haqqında ürək sözlərini, xatirələrini səsləndirmişlər.

Foto: Ələkbər Ağasiyev

 
 

“Vətənimin səs dünyası”

17 dekabr 2014- cü il saat 17.00-da Azərbaycan Milli İncəsənət Muzeyində Azərbaycan Milli İncəsənət Muzeyinin, Azərbaycan Respublikasının Nazirlər Kabineti yanında “İçərişəhər” Dövlət Tarix- Memarlıq Qoruq İdarəsi “İçərişəhər” tarixi muzeyinin, Azərbaycan Musiqi Mədəniyyəti Dövlət muzeyinin, Ü.Hacıbəyli adına Bakı Musiqi Akademiyasının birgə böyük layihəsi silsiləsindən “Dünya azərbaycanlılarının həmrəylik günü”nə həsr olunmuş “Vətənimin səs dünyası” adlı növbəti tədbir keçirilmişdir.Tədbir çərçivəsində “DA-Art” Təsviri sənət mərkəzinin məzunlarının rəsm nümunələrindən ibarət sərgi nümayiş olunmuşdur.Həmçinin, gənc ifaçıların müşayiəti ilə T.Quliyev, Q.Qarayev, F.Şopen, F.List, C.Bize, A.Sen-Sans, İ.Brams, Q.Gendel, İ.Ştraus kimi bəstəkarların əsərlərindən ibarət konsert təşkil olunmuşdur.

Foto: Ələkbər Ağasiyev

 
 

“Aydınlığa doğru”

“Aydınlığa doğru” milli-mənəvi dəyərlərin qorunması İctimai Birliyi Azərbaycan Milli İncəsənət Muzeyi ilə birlikdə Azərbaycan Yazıçılar Birliyi və Rəssamlar İttifaqının üzvü yazıçı, ssenarist, sənətşünas, Əməkdar incəsənət xadimi Sara Oğuz Nəzirovanın 70 illik yubileyinə həsr olunmuş xatirə gecəsi keçirir.

Mərhum yazıçının yaxın dostlarının, onun böyük sənətini sevənlərin, o cümlədən tanınmış ədəbiyyat, mədəniyyət və incəsənət xadimlərinin iştirakı ilə baş tutacaq  gecədə Sara xanımla bir neçə filmə imza atmış kino rejissoru, Əməkdar incəsənət xadimi Şamil Nəcəfzadənin  Sara Oğuzun çoxsahəli zəngin yaradıcılığına və həyat yoluna həsr olunmuş  sənədli filmi nümayiş etdiriləcək, qələm dostlarının yazıçı haqqında ürək sözləri, xatirələri səslənəcək.

Xatirə gecəsi 22 dekabr, saat 15.00-da  Azərbaycan Milli İncəsənət Muzeyinin kino zalında  keçiriləcək.

 
 

CODART

Azərbaycan Milli İncəsənət Muzeyinin dəvəti ilə 14 dekabr 2014-cü il tarixində CODART - holland və flamand incəsənəti kuratorlarının beynəlxalq təşkilatının rəhbəri Alie Gotrter və Jan Hesselingi Bakıda işgüzar səfərdə olmuşlar. Səfər çərçivəsində onlar Azərbaycan Respublikası Mədəniyyət və Turizm nazirinin müavini Sevda Məmmədəliyevanın qəbulunda olmuşlar. Onlar eyni zamanda Azərbaycan Dövlət Xalça Muzeyi, Qız Qalası, İçəri şəhər və Elmi Bərpa mərkəzinə tanışlıq məsəqdilə səfərləər etmişlər. Azərbaycan Milli İncəsənət Muzeyində keçirilən görüşdə muzeyin direktoru cənab Çingiz Fərzəliyev və əməkdaşları iştirak etmişlər. Qonaqlar- Alie Gotrter və Jan Hesselingi muzeyin kolleksiyasına daxil olan nəfis holland və flamand sənət nümunələrinin atributsiyası məqsədilə, rəngkarlıq və qrafika fondlarında qorunub saxlanılan sənət nümunələrinə baxış keçirtmişlər. Bu səfərin nəticəsi olaraq CODART təşkilatı ilə yaradılan əməkdaşlıq uzun müddət davam edəcək və müvafiq sahədə əlaqələrin daha da genişləndirilməsində, təcrübə mübadiləsində mühüm rol oynayacaqdır.

 
 

Səhifə 7 > 14-dəan